کھیل میدان نہ ہونے کے سبب ترال چندریگام کے نوجوان سڑک پر کھیلنے کو مجبور

ای ٹی وی بھارت کے ساتھ بات کرتے ہوئے چندریگام کے نوجوانوں نے کہا کہ" پوری وادی میں اسپورٹس سیکٹر کو فروغ دینے کے لیے کام کیا گیا ہے، لیکن بدقسمتی سے ہمارا گاؤں اس حوالے سے نظر انداز کیا گیا ہے۔"

ترال( پلوامہ):جہاں ایک طرف انتظامیہ وادی کشمیر میں کھیل کود کی سرگرمیوں کو فروغ دینے کے لیے اقدامات کر رہی ہے، جس کی وجہ سے نوجوان کھیل کود کی طرف راغب ہو رہے ہیں۔ تاہم جنوبی کشمیر کے ترال میں موجود ایک بڑے گاؤں چندریگام میں کھلاڑیوں کو آج بھی کھیل کے میدان کا انتظار ہے، جس کی وجہ سے کھلاڑیوں کے اندر مایوسی پائی جارہی ہے اور وہ سڑک پر کھیلنے کے لیے مجبور ہوئے ہیں جس کی وجہ سے انہیں کھیل کے دوران حادثات کا خطرہ لاحق رہتا ہے۔

ای ٹی وی بھارت کے ساتھ بات کرتے ہوئے چندریگام کے نوجوانوں نے کہا کہ" پوری وادی میں اسپورٹس سیکٹر کو فروغ دینے کے لیے کام کیا گیا ہے، لیکن بدقسمتی سے ہمارا گاؤں اس حوالے سے نظر انداز کیا گیا ہے اور اس گاؤں کے بچے آج بھی سڑک پر کھیل کر اپنا شوق پورا کرتے ہیں۔"

انہوں نے مزید بتایا کہ دیہی ترقی محکمہ وادی کشمیر کے ہر گاؤں میں کھیل گاہ تو تعمیر کر رہا ہے، لیکن یہاں زمین دستیاب ہونے کے باوجود کھیل گاہ ابھی تک تعمیر نہیں کیا گیا، جو کہ ایک مایوس کن بات ہے۔

مقامی کھلاڑیوں نے دعوی کیا ہے کہ یہاں ٹیلینٹ موجود ہے، لیکن صحیح پلیٹ فارم مہیا نہ ہونے سے یہاں کے نوجوان آگے بڑھ نہیں پارہے ہیں۔اگرچہ کھیل گاہ کا معاملہ یہاں مقامی لیڈر اور بھاجپا ترجمان الطاف ٹھاکر کے ساتھ بھی اٹھایا گیا ،لیکن اس حوالے سے ابھ تک کوئی پیش رفت نظر نہیں آرہی ہے۔

وہیں محکمہ دیہی ترقی کے ایک عہیدیدار عامر مشتاق نے بتایا کہ انہوں نے یہ معاملہ پہلے ہی محکمہ مال کے ساتھ اٹھایا ہے اور امید ہے کہ جلد ہی اس حوالے سے اقدامات اٹھائے جائیں گے۔