نوشہرہ سندر بنی سیٹ سے بی جے پی کے امیدوار رویندر رینا نے اپنا ووٹ ڈالا - JK Assembly Elections 2024

جموں وکشمیر اسمبلی انتخابات 2024 کے دوسرے مرحلے کے لیے ووٹنگ کا سلسلہ جاری ہے۔ صبح ہی سے رائے دہندگان جوش و خروش کے ساتھ اپنے حق کا استعمال کرنے کے لیے بڑی تعداد میں پولنگ مراکز کا رخ کر رہے ہیں۔

نوشہرہ، سندر بنی:جموں وکشمیر اسمبلی انتخابات 2024 کے سیکنڈ مرحلے کے لیے حق رائے دہی کا سلسلہ جاری ہے۔ رائے دہندوں میں جوش و خروش دیکھا جا رہا ہے۔ صبح ہی سے کئی جگہ رائے دہندوں کی قطاریں دیکھی گئیں۔ نوشہرہ سندر بنی سیٹ کے لیے بی جے پی کے امیدوار رویندر رینا نے حق رائے دہی کا استعمال کیا۔ نوشہرہ سے الیکشن لڑ رہے رویندر رینا نے کہا کہ بی جے پی کو جموں و کشمیر میں بھاری اکثریت ملنی چاہیے۔ انہوں نے اس امید کا اظہار کیا ہے کہ یہاں بی جے پی اکثریت حاصل کرے گی۔

انہوں نے مزید کہا ہے کہ وزیر اعلیٰ کوئی بھی ہو سکتا ہے۔ میں پارٹی کا ایک عام کارکن ہوں اور ہم 'نیشن فرسٹ' کے جذبہ سے کام کرتے ہیں۔ پی ایم مودی اور وزیر داخلہ امت شاہ نے جس طرح جموں و کشمیر کو نئی بلندیوں پر پہنچایا ہے، یہ ہمارے لیے فخر کی بات ہے۔ انہوں نے کچھ سیاسی پارٹیوں پر سخت تنقید کرتے ہوئے کہا کہ جب کانگریس، پی ڈی پی اور این سی کی حکومتیں تھیں تو یہاں خوف کا ماحول تھا۔ آج پی ایم مودی اور وزیر داخلہ امت شاہ کی کوششوں سے یہاں خوشی اور امن کا ماحول ہے۔ یہاں ریکارڈ ووٹنگ دیکھی جائے گی۔