گریزمیں فوج کی جانب سے مفت طبی کیمپ کا انعقاد - Medical camp at Gurez

ضلع بانڈی پورہ میں واقع ایل او سی سے متصل گاوں گریز میں ہندوستانی فوج کی جانب سے مفت طبی کیمپ کا اہتمام کیا گیا جس میں مقامی باشندوں نے جوش و خروش کے ساتھ شرکت کی

بانڈی پورہ؛مرکز کے زیر انتظام یوٹی جموں و کشمیر کے ضلع بانڈی پورہ میں واقع گریز سیکٹر میں لائن آف کنٹرول (ایل او سی) کے قریب واقع سرحدی گاوں کے باشندوں کو بنیادی طبی اور صحت کی سہولیات فراہم کرنے کے مقصد سے ہندوستانی فوج نے شمالی کشمیر کے ضلع بانڈی پورہ کی وادی گریز کے ایک دور افتادہ گاؤں تربل میں آپریشن سدبھاونا کے تحت ایک میگا میڈیکل کیمپ کا انعقاد کیا۔

کیمپ کے دوران خواتین اور بچوں سمیت بڑی مقامی آبادی کی طبی ضروریات کو پورا کیا گیا۔ دور دراز کے دیہاتوں سے آنے والوں کو مفت طبی مشورے اور ادویات فراہم کی گئیں۔فوجی ڈاکٹروں اور مقامی ڈاکٹروں نے دور دراز علاقوں سے تعلق رکھنے والے تمام مریضوں کو ناکافی طبی سہولیات کے ساتھ علاج فراہم کیا۔

میڈیکل کیمپ کو آس پاس کے دیہاتوں کے مقامی لوگوں کا زبردست ردعمل دیکھنے میں آیا جنہوں نے کیمپ کے دوران مفت طبی مشورے اور ادویات کا فائدہ اٹھایا۔دریں اثنا، مقامی لوگوں نے دور دراز علاقوں میں صحت کی بنیادی سہولیات کی فراہمی کے لیے بھارتی فوج کے اقدامات کو سراہا۔

انہوں نے یہ بھی ہندوستانی فوج سے درخواست کی کہ وادی گریز میں مقامی باشندوں کے لئے طبی کیمپ کے اہتمام جاری رکھے ،اس سے عام لوگوں کو بڑی مدد ملتی ہے۔