جامع مسجد سرینگر میں عیدالفطر کی نماز صبح ساڑھے 9 بجے ادا کی جائے گی: انجمن اوقاف - Eid ul Fitr Nimaz

Eid ul Fitr In Kashmir جموں و کشمیر، لداخ سمیت کیرالہ میں شوال المکرم کا چاند نظر آگیا، جس کے بعد ان علاقوں میں عید الفطر بدھ کے روز منائی جائے گی، جبکہ ملک کے کسی بھی حصے میں چاند دیکھنے کے شواہد نہیں ملے۔

سرینگر:انجمن اوقاف جامع مسجد سرینگر نے عید الفطر کے مبارک موقعہ پر فرزندان اسلام کو عید مبارک پیش کرتے ہوئے کہا ہے کہ انشا اللہ مرکزی جامع مسجد میں نماز عید الفطر صبح ساڑھے 9 بجے ادا کی جائیگی، جبکہ میرواعظ کشمیر جناب ڈاکٹر مولوی محمد عمر فاروق ساڑھے 8 بجے عید کا خطبہ پیش کریں گے۔

عامۃ المسلمین سے اپیل کی جاتی ہے کہ وہ نماز عید میں اپنی شرکت کو یقینی بنائیں اور تاخیر سے آنے کی صورت میں اپنا مصلیٰ ساتھ لائیں۔ اس دوران جامع اوقاف نے واضح کیا ہے کہ اس سال مبلغ 70 روپے فی کس کے حساب سے صدقہ فطر مقرر کیا گیا ہے، جو کہ نماز عید کے قبل دینا لازمی ہے۔

واضح رہے کہ ملک بھر کی مختلف رویت ہلال کمیٹیوں کے ذریعہ چاند دیکھنے کا آج اہتمام کیا گیا، لیکن مطلع صاف ہونے کے باوجود کہیں سے بھی رویت کی کوئی اطلاع موصول نہیں ہوئی ہے لہذا کل یعنی 10 اپریل کو 30 واں روزہ ہوگا اور عیدا لفطر 11 اپریل بروز جمعرات منائی جائے گی۔ البتہ جموں و کشمیر ، لداخ اور کیرالہ میں شوال المکرم کا چاند نظر آگیا ، جس کے بعد ان علاقوں میں عید الفطر بدھ کے روز منائی جائے گی۔