ایران میں کوئلے کی کان میں میتھین کا اخراج، دھماکے میں 51 افراد ہلاک - Explosion At Iran Coal Mine

مشرقی ایران میں کوئلے کی کان میں میتھین کے اخراج سے ہونے والے زوردار دھماکے میں کم از کم 51 افراد ہلاک اور متعدد زخمی ہو گئے۔

ایران : مشرقی ایران میں کوئلے کی کان میں ہوئے شدید دھماکہ میں 51 افراد ہلاک اور متعدد زخمی ہوگئے۔ دارالحکومت تہران سے تقریباً 540 کلومیٹر دور جنوب مشرق میں واقع تباس میں کوئلے کی کان میں میتھین کے اخراج سے دھماکہ ہوا۔ جنوبی خراسان صوبے کے گورنر جواد غنہات نے بتایا کہ ’جہاں کان واقع ہے وہاں امدادی ٹیمیوں کی جانب سے پھنسے ہوئے افراد کو نکالا جارہا ہے۔

ایران کی سرکاری نیوز ایجنسی ارنا کے مطابق، ہفتہ کی رات تقریباً 9:00 بجے دھماکہ ہوا تب جائے وقوعہ پر 69 کارکن موجود تھے۔ اطلاعات کے مطابق میتھین گیس کے اخراج کی وجہ سے کوئلے کی کان کے دو بلاکس میں دھماکہ ہوا۔ سرکاری ٹی وی پر نشر ویڈیو میں بتایا گیا کہ ایمبولینس اور ہیلی کاپٹرز کی جانب سے زحمیوں کو اسپتال منتقل کیا جارہا ہے۔

ایرانی صدر مسعود پزشکیان نے نیویارک میں اقوام متحدہ کی جنرل اسمبلی کے لیے روانگی سے قبل سرکاری ٹی وی پر کیے گئے ریمارکس میں متاثرین کے اہل خانہ سے تعزیت کی اور اس مہلک واقعے کی تحقیقات کا حکم دیا۔ انہوں نے کہا کہ ’بدقسمتی سے، تباس میں واقع کوئلے کی کانوں میں سے ایک کان میں حادثہ پیش آیا اور ہمارے متعدد ہم وطنوں نے اپنی جانیں گنوا دیں۔ میں ان کے معزز خاندانوں سے تعزیت کرتا ہوں‘۔

وہیں ایران کی ہلال احمر نے کہا کہ کان میں تلاش اور بچاؤ کی کارروائیاں جاری ہیں جہاں کچھ مزدور پھنسے ہوئے ہیں۔