حیدرآباد: حیدرآباد پولیس نے پشپا 2: دی رول کے پریمیئر شو (4 دسمبر) کے دوران تھیٹر میں ہونے والی بھگدڑ کے سلسلے میں تین لوگوں کو گرفتار کیا ہے۔ سندھیا تھیٹر میں پریمیئر شو کے دوران بھگدڑ میں ایک خاتون کی موت ہو گئی تھی اور اس کا بیٹا شدید زخمی ہو گیا تھا۔ اس شو میں اداکار اللو ارجن بھی سنیما ہال میں موجود تھے۔
پولیس نے کہا کہ فلم پشپا 2 کے پریمیئر شو سے پہلے ہوئی بھگدڑ میں ایک خاتون کی ہلاکت کے سلسلے میں سندھیا تھیٹر کے مالک سمیت تین لوگوں کو گرفتار کیا گیا ہے۔ پولیس نے اتوار کو بتایا کہ گرفتار ملزمان کی شناخت ایم سندیپ (37) کے طور پر کی گئی ہے، جو سندھیا تھیٹر کے مالکان میں سے ایک ہیں، دوسرا سینئر منیجر ایم ناگاراجو (51) اور بالکونی کے نچلے انچارج وجے چندر (53) ہیں۔
4 دسمبر کو پیش آئے اس واقعہ میں ریوتی نامی 35 سالہ خاتون کی موت ہوگئی تھی۔ ڈپٹی کمشنر آف پولیس (ڈی سی پی)، سینٹرل زون کی طرف سے جاری ایک پریس ریلیز کے مطابق، خاتون کو درگابائی دیشمکھ اسپتال لے جانے کے بعد اسے مردہ قرار دے دیا گیا، جب کہ اس کے بیٹے شریتیج کا علاج چل رہا ہے۔ یہ بھگدڑ اس وقت ہوئی جب اداکار اللو ارجن اپنی ذاتی سیکیورٹی کے ساتھ تھیٹر پہنچے جس کے بعد اللو ارجن کو دیکھنے کے لیے لوگ تھیٹر میں داخل ہونے کی کوشش کرنے لگے۔