ممبئی: سلمان خان، بلیک ہرن اور لارنس بشنوئی کا معاملہ دن بہ دن گرم ہوتا جا رہا ہے۔ سلمان خان کو کالے ہرن کے قتل کے معاملے میں لارنس بشنوئی گینگس کی جانب سے مسلسل جان سے مارنے کی دھمکیاں مل رہی ہیں۔ اب سلمان خان کے والد سلیم خان نے واضح طور پر کہا ہے کہ ان کا بیٹا معافی نہیں مانگے گا۔
غور طلب ہے کہ سلیم خان نے یہ بات ایسے وقت میں کہی جب گزشتہ روز سلمان خان کو ایک نئی دھمکی ملی تھی۔ نئی دھمکی میں لارنس بشنوئی سے صلح کرنے کے لیے سلمان خان سے 5 کروڑ روپے مانگے گئے۔
میرے بیٹے نے کسی کو نہیں مارا، سلیم خان
سلیم خان نے اپنے حالیہ انٹرویو میں واضح طور پر کہا ہے کہ ان کے بیٹے نے کوئی جرم نہیں کیا اور وہ معافی نہیں مانگیں گے۔ سلیم خان نے کہا کہ میرے بیٹے نے کبھی کسی جانور کا شکار نہیں کیا، سلمان خان نے آج تک کبھی کاکروچ نہیں مارا، ہم تشدد پر یقین نہیں رکھتے، لوگ جانتے ہیں کہ ہم زمین سے جڑے لوگ ہیں، لوگ کہتے ہیں کہ آپ ہمیشہ زمین کی طرف دیکھ کر چلتے ہیں، میں ان سےکہتا ہوں کہ میں نہیں چاہتا کہ ہمارے پاؤں سے ایک کیڑا بھی مر جائے، میں انہیں بھی بچاتا رہتا ہوں، بینگ ہیومن بہت سے لوگوں کی مدد کر رہا ہے، کووڈ کے دنوں میں لمبی قطاریں لگی تھیں، اگر کسی کو سرجری کی ضرورت ہوتی تو بہت سے لوگ مدد کے لیے آتے ہر روز چار سو سے زائد لوگ مدد کے لیے آتے تھے۔