اداکار پرکاش راج لیہہ میں سونم وانگچک کی بھوک ہڑتال میں شامل - Ladakh Protest

Sonam Wangchuk Hunger Strike معروف اداکار پرکاش راج نے منگل کے روز بھوک ہڑتال پر بیٹھے ماہر تعلیم سونم وانگچک کے ساتھ ملاقات کی اور اپنی 59 سالگرہ منائی۔بتادیں کہ لداخ کو ریاست کا درجہ دینے ، چھٹے شیڈول کو لاگو کرنے اور ماحولیات کو لاحق خطرات سے تحفظ فراہم کرنے کی خاطر سونم وانگچک گزشتہ بیس روز سے بھوک ہڑتال پر بیٹھے ہیں۔

سرینگر: بالی ووڈ کے معروف اداکار پرکاش راج منگل کے روز لداخ یونین ٹریٹری کے ضلع لیہہ میں معروف ماہر ماحولیات سونم وانگچک کی بھوک ہڑتال میں شامل ہوئے اور وہاں اپنا 59 ویں جنم دن منایا۔
بتادیں کہ سونم ونگچک لداخ کے ریاستی درجے اور لداخ کو آئین کے چھٹے شیڈول میں شامل کرنے کے مطالبے پر بھوک ہڑتال پر ہیں۔ وہ ماحولیات کو درپیش خطرات کے لئے بھی تشویش کا اظہار کر رہے ہیں۔

بالی ووڈ اداکار پرکاش راج منگل کے روز لیہہ پہنچ کر اس کے بھوک ہڑتال میں شامل ہوئے۔اس موقع پر انہوں نے میڈیا کے ساتھ بات کرتے ہوئے کہا کہ ونگچک صرف لداخ کے لئے نہیں بلکہ ملک کے لئے بھوک ہڑتال پر ہیں۔
ان کے مطابق سونم وانگچک ماہر تعلیم ہے اور سیاست کے ساتھ ان کی کوئی وابستگی نہیں لیکن اس کے باوجود وہ ماحولیات کوبچانے کی خاطر اپنی آواز بلند کر رہے ہیں۔انہوں نے مزید بتایا کہ ہمیں سونم وانگچک کے ساتھ شانہ بشانہ کھڑے رہنے کی اشد ضرورت ہے کیونکہ وہ ایک اہم کاز کے لئے جدوجہد کر رہے ہیں۔
معروف اداکار نے کہا کہ ہمالیائی پہاڑیوں اور گلیشئروں کو خطرات لاحق ہے جس پر سب کو صدائے احتجاج بلند کرنے کی ضرورت ہے۔پرکاش راج نے ملک کے لوگوں سے اپیل کی ہے کہ وہ وانگچک کی کوششوں میں شامل ہو کر ماحولیات کو بچانے کی خاطر آگے آئیں۔
واضح رہے کہ مرکزی وزارت داخلہ کے ساتھ مذاکرات ناکام ہونے کے بعد سونم وانگچک نے لداخ کو سٹیٹ ہڈکا درجہ دینے، چھٹے شیڈول کو لاگو کرنے اور ماحولیات کو بچانے کی خاطر بھوک ہڑتال شروع کر رکھی ہے۔

قابل ذکر ہے کہ سونم وانگچک قریب تین ہفتوں سے بھوک ہڑتال پر ہیں۔اپنی بھوک ہڑتال کے اکیسویں دن انہوں نے 'ایکس' پر ایک پوسٹ میں کہا: 'میرے 'کلائیمیٹ فاسٹ' کا 21 واں دن، 350 سو لوگ یہاں منفی 10 ڈگری سینٹی گریڈ درجہ حرارت میں سوئے،دن میں یہاں 5 ہزار لوگ جمع ہوئے لیکن پھر بھی حکومت نے کوئی بات نہیں کی'۔
انہوں نے اپنے پوسٹ میں مزید کہا: 'ہمیں ملک میں دور اندیش اور دیانتدار سیاست دانوں کی ضرورت ہے اور مجھے امید ہے کہ وزیر اعظم نریندر مودی جی اور وزیر داخلہ امیت شاہ جی بہت جلد ثابت کریں گے کہ وہ دور اندیش سیاست داں ہیں'۔
(یو این آئی)