نئی دہلی: ایسا لگتا ہے کہ مرکزی حکومت ایمپلائز پراویڈنٹ فنڈ آرگنائزیشن (EPFO ) کے تحت ملازمین کی زیادہ سے زیادہ تنخواہ کی حد بڑھانے کا منصوبہ بنا رہی ہے۔ خبر ہے کہ حکومت جلد ہی اس حوالے سے کوئی فیصلہ لے سکتی ہے۔ اس وقت یہ حد 15 ہزار روپے ہے۔ لیکن اسے بڑھا کر 30 ہزار روپے کرنے کا منصوبہ بنایا جا رہا ہے۔ گزشتہ کچھ سالوں سے اسے بڑھانے کا مطالبہ کیا جا رہا ہے۔ تاہم میڈیا رپورٹس کے حوالے سے کہا گیا ہے کہ حکومت نے ایک بار پھر اس جانب توجہ مرکوز کی ہے۔
ای پی ایف او میں کمپنیوں کا رجسٹریشن:
ملازمین کی تعداد کے لحاظ سے ای پی ایف او کے ساتھ کمپنیوں کی رجسٹریشن لازمی ہے۔ لیکن اب ایسا بھی مانا جا رہا ہے کہ ملازمین کی تعداد کی حد میں کمی کی جا سکتی ہے۔ فی الحال، 20 یا اس سے زیادہ ملازمین والی کمپنیوں کو ای پی ایف او میں شامل ہونا ضروری ہے۔ لیکن اس تعداد کو 20 سے کم کر کے 15 کرنے کا امکان ہے۔
تاہم ایسی بھی خبریں گشت کر رہی ہیں کہ چھوٹی اور درمیانی کمپنیاں اس تجویز کی سخت مخالفت کر رہی ہیں۔ تنخواہ کی حد میں اضافے سے حکومت کے ساتھ ساتھ نجی شعبے پر بھی بوجھ پڑے گا۔ اس کا فائدہ صرف ملازمین کو ہوگا۔ ای پی ایف او کی زیادہ سے زیادہ تنخواہ کی حد آخری بار 2014 میں نظر ثانی کی گئی تھی۔ اس وقت اسے 6500 روپے سے بڑھا کر 15000 روپے کر دیا گیا تھا۔ اگر مراعات میں اضافہ ہوتا ہے تو تنخواہ کی حد بھی بڑھ جائے گی جس سے ملازمین کے پراویڈنٹ فنڈ اکاؤنٹ میں جمع ہونے والی رقم بڑھ جائے گی۔ عام طور پر ملازم کا حصہ تنخواہ کا 12 فیصد اور امپلائر کا حصہ 12 فیصد ہوتا ہے۔
ملازم کا حصہ مکمل طور پر ای پی ایف اکاؤنٹ میں جمع ہوتا ہے۔ امپلائر کا 8.33 فیصد حصہ پنشن اسکیم میں جمع کیا جاتا ہے۔ باقی رقم ای پی ایف اکاؤنٹ میں جمع کرائی جائے گی۔ اگر زیادہ سے زیادہ تنخواہ کی حد میں اضافہ کیا جاتا ہے، تو ملازمین اور امپلائر کی طرف سے ادا کیا جانے والا حصہ بھی اسی حد تک بڑھ جائے گا۔ اس سے ای پی ایف او اور ای پی ایس کھاتوں میں جمع ہونے والی رقم میں اضافہ ہوگا۔ اس سے ملازمین ریٹائرمنٹ کے وقت اپنے پراویڈنٹ فنڈ کی جمع رقم میں اضافہ کر سکتے ہیں۔
یہ بھی پڑھیں:
