کیا آپ کے بھی بینک اکاؤنٹ سے بغیر کسی وجہ 236 روپے کاٹے گئے؟ اگر ہاں تو یہاں ملے گا جواب

SBI بغیر کسی ٹرانزیکشن کے آپ کے اکاؤنٹ سے 236 روپے ڈیبٹ کرتا ہے۔ جانیے کیوں؟

ممبئی: ایس بی آئی کے بچت کھاتہ دار(saving account holders) ہوشیار رہیں! اسٹیٹ بینک آف انڈیا(SBI) کسٹمر بیس کے لحاظ سے دنیا کے سب سے بڑے مالیاتی اداروں میں سے ایک ہے۔ ایس بی آئی کو ہر ہندوستانی کا بینکر کہا جاتا ہے کیونکہ یہ 50 کروڑ سے زیادہ صارفین کی خدمت کرتا ہے۔ جیسے جیسے صارفین ڈیجیٹل ہو رہے ہیں، بینک بھی اپنے بینکنگ کے انداز کو بدل رہے ہیں، چاہے وہ YONO ایپ ہو یا انٹرنیٹ بینکنگ کی سہولت۔

اسٹیٹ بینک آف انڈیا اپنے صارفین کے بینکنگ کے تجربے کو بہتر بنانے کے لیے کام کر رہا ہے اور اس طرح کئی سہولیات متعارف کروا رہا ہے۔ کسی دوسرے بینک کی طرح، ایس بی آئی بھی اپنے صارفین کو ڈیبٹ کارڈ فراہم کرتا ہے، جسے اے ٹی ایم کارڈز کے نام سے جانا جاتا ہے۔ اے ٹی ایم کارڈ صارف کو اے ٹی ایم سے نقد رقم نکالنے اور خریداری کے لیے آن لائن ادائیگی کرنے کے قابل بناتا ہے۔

کیا آپ نے کبھی اپنی ایس بی آئی پاس بک کو قریب سے چیک کیا ہے؟ جب آپ اپنی پاس بک چیک کرتے ہیں یا بینک سے وقتاً فوقتاً موصول ہونے والے پیغامات کو دیکھتے ہیں، تو آپ کو معلوم ہوگا کہ بینک نے بغیر کسی لین دین کے آپ کے بینک اکاؤنٹ سے 236 روپے ڈیبٹ کر لیے ہیں۔ درحقیقت، آپ جو ڈیبٹ/اے ٹی ایم کارڈ استعمال کر رہے ہیں اس کے سالانہ مینٹیننس/سروس چارجز کے طور پر آپ کے اکاؤنٹ سے رقم کاٹی گئی ہے۔

اے ایم سی چارجز پر جی ایس ٹی:

ایس بی آئی اپنے صارفین کو مختلف قسم کے ڈیبٹ کارڈز پیش کرتا ہے، جن میں سے زیادہ تر کلاسک، سلور، گلوبل یا کنٹیکٹ لیس کارڈز ہیں۔ بینک ان کارڈز کے لیے 200 روپے سالانہ مینٹیننس فیس لیتا ہے۔ اب آپ سوچ رہے ہوں گے کہ اگر اے ایم سی چارجز 200 روپے ہیں تو ایس بی آئی نے 236 روپے کیوں کاٹ لیے؟ اس کی وجہ یہ ہے کہ حکومت بینکوں کے ذریعے ہونے والے لین دین پر 18 فیصد جی ایس ٹی لگاتی ہے۔ لہذا، اپنی جیب سے جی ایس ٹی ادا کرنے کے بجائے، بینک صارف کے بچت بینک اکاؤنٹ سے جی ایس ٹی کاٹتا ہے۔ تو اس طرح 200 روپئے کا 18 فیصد جی ایس ٹی 36 روپے ہوتا ہے جو کل ڈیبٹ رقم کو 236 روپے بنا دیتی ہے۔