ہریدوار انتظامیہ نے کانوڑ میلہ کے راستے پر مساجد اور درگاہوں کو ڈھانپ دیا، مسلمانوں نے ہندو۔ مسلم میں تفریق سے کیا تعبیر - mosques and dargah controversy

کانوڑ یاترا کے دوران دوکانداروں کو نام کی تختیاں لگانے سے ابھی سپریم کورٹ سے راحت ہی ملی تھی کہ اب دوسرا تنازعہ کھڑا ہو گیا ہے۔ ہریدوار ضلع انتظامیہ نے کچھ مقامات پر کانوڑ یاترا کے راستے پر پڑنے والی مساجد اور درگاہوں کو پردوں سے ڈھانک دیا ہے۔ اس کارروائی سے مسلم کمیونٹی کے لوگ تشویش میں مبتلا ہیں۔

ہریدوار: اس بار ساون کے کانوڑ میلے میں نام کی تختیوں کو لے کر شروع ہونے والا ہنگامہ ابھی پوری طرح سے تھم نہیں پایا تھا کہ انتظامیہ کا ایک قدم ہریدوار میں بحث کا موضوع بن گیا ہے۔ یہاں ایسا پہلی بار ہوا ہے کہ ہریدوار انتظامیہ نے کانوڑ میلہ کے راستے پر پڑنے والی مساجد اور مقبروں کو پردوں کے پیچھے چھپا دیا ہے۔ میلے کے دوران آریہ نگر کے قریب اسلام نگر کی مسجد اور اونچے پل پر بنائے گئے مقبرے اور مسجد کو پردے سے ڈھانپ دیا گیا ہے۔ انتظامیہ کے اس اقدام سے مقامی لوگ ناراض ہیں اور یہ مسئلہ موضوع بحث بنا ہوا ہے.

کانوڑ میلے کے دوران مسجدوں اور مزاروں کو ڈھانپ دیا گیا:

جب ای ٹی وی بھارت نے مسجد کے امام اور آس پاس کے مقامی لوگوں سے بات کی تو انہوں نے کہا کہ یہ پہلی بار ہے کہ مساجد کو اس طرح پردوں کے پیچھے چھپا دیا گیا ہے۔ کانوڑ میلے کے دوران آج سے پہلے کبھی مساجد نہیں چھپائی گئیں۔ جب ان سے پوچھا گیا کہ اس کے پیچھے کیا وجہ ہے کہ ایسا پہلی بار کیا گیا ہے۔ تو مقامی لوگ اس سے لا علمی کا اظہار کر رہے ہیں۔ مقامی لوگوں اور مسجد کے مولانا واضح طور پر اسے آپسی بھائی چارے میں دراڑ ڈالنے کی جانب ایک قدم اور ہندوؤں اور مسلمانوں کے درمیان ایک طرح کی تفریق سے تعبیر کیا ہے۔ مقامی مسلمانوں کے مطابق اس سے پہلے جب بھی کانوڑ میلہ ہوتا تھا، مسلمان شیو بھکت کانوڑیوں کی خدمت کرتے تھے۔ شیو بھکت کانوڑیوں کا بھی اس سے کوئی لینا دینا نہیں تھا۔ لیکن یہ پہلا موقع ہے کہ مساجد کو پردے سے ڈھانپ دیا گیا ہے۔

ہریدوار انتظامیہ نے کانوڑ میلہ کے راستے پر مساجد اور درگاہوں کو ڈھانپ دیا (ETV BHARAT)

کانوڑیوں کا ملا جلا رد عمل:

جب اس موضوع پر شیو بھکت کانوڑیوں سے بات کی گئی تو ان کا ملا جلا ردعمل سامنے آیا۔ بہت سے شیو بھکت کانوڑیوں نے انتظامیہ کی اس سوچ کو درست قرار دیا تو بعض نے اس موضوع پر خاموشی اختیار کر لی۔

بہت سے لوگوں نے کہا کہ ہندو مسلم اتحاد کے لیے مشہور اس میلے میں ہندوؤں کو مسلمانوں سے کسی قسم کی دشمنی نہیں ہے۔ جب ای ٹی وی بھارت نے حکام سے اس معاملے پر معلومات مانگی تو ہر کوئی اس موضوع پر بات کرنے سے بچنے کی کوشش کر رہا تھا۔ اس معاملے پر حکام ایک دوسرے پر الزامات لگا رہے ہیں۔

ہریدوار انتظامیہ نے کانوڑ میلہ کے راستے پر مساجد اور درگاہوں کو ڈھانپ دیا (ETV BHARAT)

اتراکھنڈ کے وزیر اوقاف و ثقافت نے کیا کہا؟

اتراکھنڈ کے وزیر اوقاف و ثقافت ستپال مہاراج نے کہا کہ اس میں کوئی پریشانی نہیں ہونی چاہیے۔ انہوں نے کہا کہ جب بھی کچھ ہوتا ہے تو اس پر تنازعی کھڑا کیا جاتا ہے۔ یہ کارروائی اس لیے کی گئی ہے کہ کوئی ناراض نہ ہو۔ یہ اس بات کو یقینی بنانے کی کوشش ہے کہ ہماری کانوڑ یاترا آسانی سے چل سکے۔ جب بھی کوئی تعمیراتی کام ہوتا ہے تو اسے ڈھانپ کر رکھا جاتا ہے۔ اسی طرح مساجد اور مقبروں کو بھی ڈھانپ دیا گیا ہے۔