دہلی کے گریٹر کیلاش میں کیجریوال پر حملہ، عآپ نے بی جے پی پر لگایا الزام

اروند کیجریوال پر ایک بار پھر حملہ کرنے کی کوشش کی گئی، حامیوں نے ملزم کی زبردست پٹائی کی۔

نئی دہلی: راجدھانی دہلی کے گریٹر کیلاش علاقے میں پد یاترا کے دوران دہلی کے سابق وزیر اعلی اور عام آدمی پارٹی کے قومی کنوینر اروند کیجریوال پر ایک شخص نے لکویڈ پھینکنے کی کوشش کی۔ بعد ازاں اس شخص کو ان کے سکیورٹی اہلکاروں نے پکڑ لیا اور اس کی شدید پٹائی کی۔ آپ کو بتاتے چلیں کہ کیجریوال ان دنوں دہلی اسمبلی انتخابات کے پیش نظر روزانہ یاترا کر رہے ہیں۔ اسی کے تحت وہ آج گریٹر کیلاش میں پیدل یاترا کر رہے تھے۔

وزیراعلی آتشی کا ردعمل:

سی ایم آتشی نے اروند کیجریوال حملے پر کہا، "بی جے پی کارکن نے کیجریوال پر حملہ کیا۔ دہلی کے الیکشن ہارنے کی مایوسی بی جے پی میں دکھائی دے رہی ہے، دہلی کے لوگ بی جے پی والوں کی ایسی بری حرکتوں کا بدلہ لیں گے۔ پچھلی بار 8 سیٹیں تھیں، اس بار دہلی کے لوگ بی جے پی کو صفر سیٹیں دیں گے۔"

وزیر سوربھ بھردواج نے کہا، "بی جے پی لیڈر تمام ریاستوں میں ریلیاں نکالتے ہیں، ان پر کبھی حملہ نہیں کیا جاتا۔ کیجریوال پر مسلسل حملے کیے گئے۔ بی جے پی نے ناگولی اور چھتر پور میں ان پر حملہ کیا۔ اور وزیر داخلہ کچھ نہیں کر رہے ہیں۔"

منیش سسودیا کا ردعمل:

اروند کیجریوال حملے پر عام آدمی پارٹی کے رہنما منیش سسودیا نے کہا کہ آج اروند کیجریوال پر بی جے پی کے غنڈے نے حملہ کیا۔ کل انہوں نے دہلی میں امن و امان کی بگڑتی صورتحال پر سوال اٹھایا تو آج ان پر بزدلانہ حملہ کیا گیا۔ اس کارروائی سے ظاہر ہوتا ہے کہ بی جے پی لا اینڈ آرڈر کا مسئلہ اٹھاتے ہی کتنی مایوس ہو گئی ہے، لیکن بی جے پی والے دھیان رکھیں، ان کا نام اروند کیجریوال ہے۔ وہ تمہارے غنڈوں کے حملوں سے نہیں ڈرتے۔

سیاست میں تشدد کی کوئی جگہ نہیں ہے:

عآپ لیڈر راگھو چڈا نے اروند کیجریوال پر حملے کی مذمت کرتے ہوئے کہا کہ کل اروند کیجریوال نے دہلی میں امن و امان کی بگڑتی صورتحال پر آواز اٹھائی اور آج خود ان پر بزدلانہ حملہ کیا گیا۔ یہ انتہائی قابل مذمت ہے۔ جمہوری سیاست میں تشدد کی کوئی جگہ نہیں ہے۔ اروند کیجریوال جی پر کروڑوں لوگوں کا آشیرواد ہے۔

دہلی میں قانون کی حکمرانی نہیں ہے:

دوسری طرف عام آدمی پارٹی نے بھی کیجریوال پر حملے کی مذمت کرتے ہوئے لکھا ہے کہ ایک بار پھر واضح ہو گیا ہے کہ دہلی میں قانون کی حکمرانی نہیں ہے بلکہ بی جے پی کے غنڈوں کا راج ہے۔ ملک کے دارالحکومت میں ایک سابق وزیر اعلیٰ محفوظ نہیں تو عام آدمی کا کیا بنے گا؟