Exercises For Sexual Health: శృంగారం వల్ల దంపతుల్లో ఎన్నో ఆరోగ్య ప్రయోజనాలు చేకూరతాయి. అయితే ఈ ఆసక్తి పెరగాలంటే.. క్రమం తప్పకుండా వ్యాయామం చేయడం కూడా ముఖ్యమేనంటున్నారు నిపుణులు. వివిధ రకాల వర్కవుట్స్‌ వల్ల శరీరం స్పందించే విధానం, పలు శారీరక చర్యలు ఈ కోరికల్ని పెంచడానికి దోహదం చేస్తాయంటున్నారు.
ఆకర్షణ పెరుగుతుంది!.. క్రమం తప్పకుండా వ్యాయామం చేయడం వల్ల చక్కటి శరీరాకృతి మన సొంతమవుతుంది. ఇది మనలో స్వీయ ప్రేమను, ఆత్మవిశ్వాసాన్ని పెంచుతుంది. అలాగే భాగస్వామికి మన పట్ల ఆకర్షణ మరింత పెరుగుతుంది. ఇది లైంగిక చర్యకు ప్రేరేపించడం సహా కలయికనూ ఆస్వాదించేలా చేస్తుందంటున్నారు నిపుణులు.
కండరాలు చురుగ్గా! :వ్యాయామం చేయని మహిళలతో పోల్చితే వ్యాయామం చేసే మహిళల్లో లైంగిక కోరికలు పెరిగినట్లు టెక్సాస్‌ విశ్వవిద్యాలయం నిర్వహించిన ఓ సర్వేలో తేలింది. అదెలాగంటే.. వర్కవుట్స్‌ చేసే క్రమంలో గుండె కొట్టుకునే వేగం పెరుగుతుంది.. శ్వాస తీసుకోవడమూ ఎక్కువవుతుంది. తద్వారా కండరాలు మరింత చురుగ్గా పనిచేస్తాయి.. ఈ మార్పులన్నీ అంతిమంగా లైంగిక కోరికలు పెంచడం సహా శృంగారాన్నీ ఆస్వాదించేలా చేస్తాయట!
ఒత్తిడి తగ్గితే సరి!.. లైంగికాసక్తిని, శృంగార కోరికల్ని హరించే వాటిలో ఒత్తిడిది అగ్రస్థానం. వివిధ వ్యక్తిగత, వృత్తిపరమైన కారణాలు మనల్ని ఒత్తిడి, ఆందోళనల్లోకి నెట్టేస్తున్నాయి. అందుకే వీటిని తగ్గించుకోవాలంటే రోజూ వ్యాయామం చేయాల్సిందే అంటున్నారు నిపుణులు. ఇలా వివిధ రకాల వర్కవుట్స్‌ చేయడం వల్ల శరీరంలో ఎండార్ఫిన్లు (హ్యాపీ హార్మోన్లు) విడుదలవుతాయి. ఇవి శారీరక నొప్పులు, ఒత్తిడి-ఆందోళనల్ని తగ్గించడం సహా సంతోషాన్ని-ఉత్సాహాన్ని రెట్టింపు చేస్తాయి. తద్వారా లైంగికాసక్తి కూడా క్రమంగా పెరుగుతుంది.