BRS leaders staged dharna in Khammam: పెరిగిన గ్యాస్ ధరలు, కేంద్రం తీరును నిరసిస్తూ అధికార బీఆర్ఎస్ ఆందోళనలు రెండో రోజూ కొనసాగుతున్నాయి. పెంచిన గ్యాస్ ధరలను నిరసిస్తూ బీఆర్ఎస్ పార్టీ శ్రేణులు ఆందోళనను చేపట్టాయి. ఐటీ, పురపాలక శాఖ మంత్రి కేటీఆర్ ఆదేశాల మేరకు పలుచోట్ల ధర్నాలు నిర్వహించారు. గ్యాస్ సిలిండర్ను ఉరితీసి.. మరో సిలిండర్ను పాడెపై ఊరేగిస్తూ నిరసనలు వ్యక్తం చేశారు. పెరిగిన ధరలతో సామాన్య, మధ్య తరగతి కుటుంబాలపై భారం పడుతుందని ఆవేదన వ్యక్తం చేశారు. మోదీ పాలనలో గ్యాస్ ధర రూ.500 నుంచి రూ.1200కు చేరిందని ఆరోపించారు. కేంద్రం కార్పొరేట్ శక్తులకే కార్పెట్ వేస్తుందని.. సామాన్య, మధ్య తరగతి కుటుంబాలను గాలికి వదిలేసిందని విమర్శించారు.
మహిళల నిరసన:పెరిగిన వంట గ్యాస్ ధరలకు నిరసనగా.. హైదరాబాద్ కోఠిలో బీఆర్ఎస్ పార్టీ మహిళలు వినూత్నంగా నిరసనకు దిగారు. రెండో రోజు గోషామహల్ నియోజకవర్గంలో ఆ పార్టీ నాయకులు నిరసన కొనసాగించారు. కోఠిలో గ్యాస్ లోడ్తో వెళ్తున్న ఆటోను.. బీఆర్ఎస్ రాష్ట్ర నాయకురాలు శీలం సరస్వతితో పాటు పలువురు మహిళలు అడ్డుకున్నారు. ఆటో డ్రైవర్, కార్మికుడు కూడా మహిళలకు మద్దతుగా గ్యాస్ ధరలు తగ్గించాలని డిమాండ్ చేశారు. కేంద్ర ప్రభుత్వానికి, ప్రధాని నరేంద్ర మోదీకి వ్యతిరేకంగా నినాదాలు చేశారు. పేద, సామాన్య తరగతి ప్రజలకు పెను భారంగా మారిన పెంచిన వంట గ్యాస్ ధరలను వెంటనే తగ్గించాలని డిమాండ్ చేశారు.