నెల రోజులకు చేరుకున్న గల్ఫ్ బాధితుడి​ మృతదేహం

సొంత గ్రామంలో ఉపాధి లేక గల్ఫ్​కి వెళ్లాడు. నాలుగేళ్లుగా కుటుంబాన్ని పోషించుకుంటూ వచ్చాడు. ఇంతలో పనిచేస్తున్న కంపెనీలో జరిగిన ప్రమాదంతో మృత్యువు పలకరించింది. నెల రోజుల తర్వాత ఇంటి పెద్ద దిక్కు మృతదేహంగా ఇంటికి చేరుకున్నాడు. ఒక్కసారిగా ఆ గ్రామంలో విషాదం అలుముకుంది.

జగిత్యాల జిల్లా కొడిమ్యాల మండలం తిప్పాయిపల్లికి చెందిన గల్ఫ్ వలస జీవి నరుకుల్ల శ్రీనివాస్ దుర్మరణం విషాదకరంగా మారింది. సొంత గ్రామంలో ఉపాధి లేక గత నాలుగేళ్లుగా గల్ఫ్ దేశమైన ఖతార్​లో పనిచేస్తూ కుటుంబాన్ని పోషించుకుంటున్నాడు. నెల రోజుల క్రితం శ్రీనివాస్ పనిచేస్తున్న కంపెనీలో ప్రమాదం జరిగి మృత్యువాత పడ్డాడు.

తరలింపులో జాప్యం:

అతని మరణ వార్త విన్న మరుక్షణం నుంచి కుటుంబ సభ్యులు రోదనలతో కాలం గడిపారు. మృతునికి భార్య, కుమారుడు ఉన్నారు. మృతదేహం తరలింపులో జాప్యం జరగడం వల్ల చివరికి ఖతార్​లోని ప్రవాస భారతీయుల గల్ఫ్ సేవ సమితి సభ్యులు.. రాయబార కార్యాలయ అధికారులతో సంప్రదించి చర్యలు తీసుకున్నారు.

నెల రోజుల తర్వాత:

నెల రోజుల అనంతరం నరుకుల్ల శ్రీనివాస్ మృతదేహం తిప్పాయిపల్లి చేరుకోవడం వల్ల గ్రామంలో విషాదం చోటు చేసుకుంది. అంతిమయాత్రలో ప్రవాసి మిత్ర లేబర్ యూనియన్ సభ్యులు ప్లకార్డులు ప్రదర్శించారు. గల్ఫ్​లో మరణించే వలస జీవులకు ఐదు లక్షల పరిహారం అందించాలని కోరారు.

ఇవీ చూడండి:వైష్ణవి ఆస్పత్రి మేనేజింగ్ డైరెక్టర్ ఆత్మహత్య