ఒక బృందాన్ని సమర్థంగా ముందుకు నడిపించాలంటే నాయకత్వం పటిష్టంగా ఉండాలనే పాఠాన్ని మనం చీమ నుంచి నేర్చుకోవచ్చు. 'ఐకమత్యమే మహాబలం', 'కలిసుంటే కలదు సుఖం' అనే సామెతలు చీమలు కలిసికట్టుగా ఉండే పద్ధతిని చూసే కనిపెట్టారేమో. ఒకే మాటకి బృందమంతా కట్టుబడి ఉండడం, నియమ నిబంధనలను పాటించే విషయంలో అందరూ ఒకేలా వ్యవహరించడం లాంటివన్నీ నాయకత్వం బలంగా ఉన్నప్పుడే జరుగుతాయి.
ఒక లక్ష్యం కోసం
చీమల ప్రధాన లక్ష్యం ఆహారాన్ని సేకరించడం. అందుకోసం ఒక నిర్దిష్ట లక్ష్యాన్ని ఏర్పరచుకొని అన్నీ కలిసి శక్తివంచన లేకుండా శ్రమిస్తాయి. సమయాన్ని సద్వినియోగం చేసుకుంటూ ఒక నిర్ణీత బాటలో నడుస్తాయి. చలికాలంలో ఆహారం కోసం వేసవి కాలం నుంచే శ్రమిస్తాయి చీమలు. ఈ పద్ధతి ఒక రకంగా ముందస్తు ప్రణాళిక లాంటిది. దీర్ఘకాలిక లక్ష్యాల కోసం ముందుగానే సిద్ధమవ్వడం విజయానికి బాటను నిర్మించడమే కదా!
సమయపాలన
సమయపాలన పాటించడం, క్రమశిక్షణతో ముందుకు సాగడం.. వంటి విషయాల్లోనూ చీమలను ఉదాహరణగా తీసుకోవచ్చు. ఏ సమయంలో పని చేయాలో, ఏ సమయంలో పని ముగించాలో, ఏ సమయంలో నిద్రపోవాలో చీమలకు బాగా తెలుసు. నిరంతరాయంగా పని చేయడం, ఆ తర్వాత చాలాకాలం నిద్రపోవడం చీమల నైజం. ఇది మానవులకు పూర్తిగా వర్తించనప్పటికీ పని విషయంలో ఎంత ప్రణాళికాబద్ధంగా ఉండాలన్న అంశంలో చీమలను ఆదర్శంగా తీసుకోవచ్చు.
నిర్మాణాత్మకంగా వ్యవహరించడం
చీమలు తమ పుట్టను నిర్మించుకొనే క్రమంలో కూడా అన్నీ కలిసికట్టుగానే ముందుకు సాగుతాయి. ఒక పుట్ట నిర్మించడం కోసం కొన్ని వందల చీమలు శ్రమిస్తాయి. అలాగే ఒక సంస్థ నిర్మాణం ఏ ఒక్క వ్యక్తి వల్లో సాధ్యం కాదని, అనేకమంది ఉద్యోగుల పాత్ర కూడా అందులో ఉంటుందనే విషయాన్ని చీమలు స్పష్టంగా తేటతెల్లం చేస్తున్నాయి.