చలిలో రోడ్ల పక్కే నివాసం.. శునకాలతో సావాసం.. చలికాలంలో ఇంట్లో ఉన్నవాళ్లే దుప్పట్లు కప్పుకుని పడుకుంటారు. అలాంటిది భిక్షాటన చేసేవారు.. అనాథలు, అభాగ్యులు మాత్రం పుట్ పాత్ల పైనే నిద్రిస్తుంటారు. ప్రభుత్వం కొన్ని ప్రాంతాల్లో రాత్రి ఆశ్రమం కల్పించినా.. ఇంకా చాలాప్రాంతాల్లో ఇటువంటి వారు చలికి వణుకుతూనే ఉన్నారు. సికింద్రాబాద్ పరిసర ప్రాంతాల్లోని మహాంకాళి దేవాలయం, పారడైజ్ హోటల్ వీధి, గాంధీ ఆసుపత్రి పరిసర ప్రాంతాలు, నారాయణగూడ చౌరస్తా, చిక్కడపల్లి తదితర ప్రాంతాల్లో ఎక్కువగా ఇటువంటివారు కన్పిస్తారు.
అయితే హిదాయత్ ఫౌండేషన్ వ్యవస్థాపకుడు మొహమ్మద్ షాహిద్ పేదలకు సాయం చేయాలని పరితపించాడు. చిన్న కిరాణ కొట్టు నడిపిస్తూ జీవితం సాగిస్తున్నా.. మొహమ్మద్ ఉన్న దాంట్లో సాయం చేయాలనుకున్నాడు. అర్ధరాత్రి రోడ్ల పక్కన పడుకున్న అభాగ్యులకు దుప్పట్లు కప్పి తన ఔదార్యాన్ని చాటుకున్నాడు.
రాత్రి వేళల్లో పోలీసులు కూడా సరిగ్గా పడుకోనివ్వడంలేదని రోడ్ల పక్కన పడుకున్నవారు ఆవేదన వ్యక్తం చేశారు. అసలే ఇళ్లు లేవని.. కనీసం రోడ్డు పక్కన పడుకుందామంటే.. ఎప్పుడు ఎవరొచ్చి వెళ్లగొడతారో అని భయంభయంగా ఉంటుందన్నారు. ఒక్కోసారి వాహనాలు వేగంగా వచ్చి మీదకు దూసుకొచ్చిన ఘటనలు కూడా జరుగుతున్నాయని తెలిపారు. అలా చనిపోయినా.. పట్టించుకునే వారు ఉండరన్నారు. చనిపోయిన వారికోసం ఎవ్వరూ రాకపోవడం వల్ల వారిని అలాగే తీసుకెళతారని పేర్కొన్నారు.
రోడ్లపక్క జీవితం.. గాలిలో దీపం లాంటిదని బాధితులు అభిప్రాయపడుతున్నారు. ఎంతవరకు బతుకుతామో తెలియదని.. జీవించినంత కాలం.. ఇలా రోడ్లమీదనే ఉంటామంటున్నారు. ప్రభుత్వం ఆదుకుని రాత్రి వేళ పడుకునేందుకు ఆశ్రమం కల్పించాలని వేడుకుంటున్నారు.
ఇవీ చూడండి: 'ఓట్ల కోసం వచ్చే మంత్రి మల్లారెడ్డి.. ఇప్పుడు ఎందుకు రావడం లేదు'
