ఖాతాలో నుంచి డబ్బులు పోయాయని నర్సు ఆత్మహత్య

హైదరాబాద్​ ఎస్సార్​ నగర్​ పోలీస్​స్టేషన్​ పరిధిలో ఓ నర్సు ఆత్మహత్య చేసుకుంది. తన చరవాణి నుంచి కుటుంబసభ్యులకు డబ్బులు పంపించేందుకు ప్రయత్నించగా... వేరే ఖాతాలోకి వెళ్లటం వల్ల తీవ్ర మనస్తాపానికి గురై బలవన్మరణానికి పాల్పడింది.

తన బ్యాంకు ఖాతా నుంచి నగదువేరే ఖాతాకు వెళ్లినందుకు మనస్థాపం చెందిన ఓ నర్సు ఆత్మహత్య చేసుకున్న ఘటన హైదరాబాద్​ ఎస్సార్​నగర్​ పోలీస్​స్టేషన్​ పరిధిలో చోటుచేసుకుంది. మేఘాలయకు చెందిన రీటా(32) జీవనోపాధి నిమిత్తం ఏడాదిన్నర కిందట నగరానికి వచ్చింది. బేగంపేట్​లోని నైటింగేల్ హోంఫర్ హెల్త్ కేర్ సర్వీస్​లో నర్స్​గా విధులు నిర్వహిస్తోంది. వివిధ ప్రాంతాల్లో వృద్దులకు సేవలు అందించడం కోసం నైటింగేల్ సంస్థ తమ వద్ద ఉన్న నర్సులను పంపిస్తూ ఉంటుంది.

తనకు వచ్చిన వేతనాన్ని బ్యాంక్​లో జమ చేసుకుంటుంది రీటా. ఇటీవల తన చరవాణిలో డబ్బును కుటుంబసభ్యులకు పంపేందుకు ప్రయత్నించగా... పొరపాటున వేరే ఖాతాలో జమయ్యాయి. డబ్బులు గల్లతవ్వటం వల్ల తీవ్ర మనస్తాపానికి గురైన రీటా... ఆత్మహత్యకు పాల్పడినట్లు పోలీసులు తెలిపారు.

రీటాకు చాలా తక్కువ వేతనం వచ్చేదని... తనకు లోకజ్ఞానం అంతగా లేదని డైరీలో రాసుకున్నట్లు పోలీసులు పేర్కొన్నారు. కేసు నమోదు చేసుకున్న పోలీసులు పలు కోణాల్లో దర్యాప్తు చేస్తున్నారు.

ఇవీ చూడండి: పొలంలో కరెంట్ షాక్​తో రైతు మృతి