కార్వీ స్టాక్ బ్రోకింగ్ లిమిటెడ్లోని పలు పత్రాలను హైదరాబాద్ సీసీఎస్ పోలీసులు స్వాధీనం చేసుకున్నారు. నకిలీ తీర్మానపత్రాలను పెట్టి హెచ్డీఎఫ్సీ బ్యాంకులో రుణం తీసుకున్న కేసులో పోలీసులు పలు ఆధారాలు సేకరించారు. హెచ్డీఎఫ్సీ బ్యాంకు నుంచి 350 కోట్ల రూపాయలు రుణం తీసుకొని తిరిగి చెల్లించని కేసులో సీసీఎస్ పోలీసులు నాంపల్లి కోర్టు అనుమతితో పార్థసారథిని రెండు రోజుల కస్టడీలోకి తీసుకున్నారు. రెండు రోజుల పాటు పార్థసారథిని ప్రశ్నించిన పోలీసులు.. కీలక సమాచారం సేకరించారు. అతను ఇచ్చిన సమాచారం ఆధారంగా కార్యాలయంలో సోదాలు నిర్వహించి పత్రాలు, హార్డ్డిస్క్లు స్వాధీనం చేసుకున్నారు. పార్థసారథి నుంచి సేకరించిన సమాచారం ఆధారంగా సీసీఎస్ పోలీసులు దర్యాప్తు కొనసాగిస్తున్నారు. పార్థసారథి కస్టడీ ముగియడంతో సీసీఎస్ పోలీసులు నాంపల్లి కోర్టులో హాజరుపర్చారు. న్యాయస్థానం ఆదేశం మేరకు పార్థసారథిని చంచల్ గూడ జైలుకు రిమాండ్కు తరలించారు.
గచ్చిబౌలి పీఎస్లోనూ కార్వీ సంస్థపై కేసు నమోదైంది. ఐసీఐసీఐ బ్యాంకులో దాదాపు 550కోట్ల రుణం తీసుకొని తిరిగి చెల్లించకపోవడంతో ఐసీఐసీఐ ప్రతినిధులు ఫిర్యాదు చేయగా గచ్చిబౌలి పోలీసులు కేసు నమోదు చేశారు. ఈ కేసును సైబరాబాద్ కమిషనరేట్ లోని ఆర్థిక నేరాల విభాగం దర్యాప్తు చేస్తోంది. పార్థసారథిని కస్టడీకి ఇవ్వాలని సైబరాబాద్ పోలీసులు నాంపల్లి కోర్టులో పిటిషన్ దాఖలు చేశారు. ఈ పిటిషన్పై సోమవారం వాదనలు జరిగే అవకాశం ఉంది.