ఆర్టీసీ సమస్య ముగింపునకే కేబినెట్ సమావేశం!

ఆర్టీసీపై ప్రభుత్వం తీసుకోబోయే నిర్ణయం ఉత్కంఠను రేపుతోంది. సమస్యకు ముగింపు పలికేందుకు రేపు మంత్రివర్గాన్ని సీఎం కేసీఆర్ సమావేశపర్చనున్నారు. కార్మిక న్యాయస్థానంలోనే తేల్చుకుంటారా... లేక కార్మికశాఖ కమిషనర్ స్థాయిలోనే సమస్య పరిష్కారమయ్యేలా చూస్తారా అనేది తేలాల్సి ఉంది. కార్మికుల భవిష్యత్​పై ఎలాంటి నిర్ణయం తీసుకుంటారనేది రేపు తెలియనుంది.

ఆర్టీసీ కార్మికులు సమ్మె విరమించినప్పటికీ విధులకు హాజరు కాని దుస్థితి నెలకొంది. చట్టవిరుద్ధంగా సమ్మెలోకి వెళ్లిన కార్మికులు... ఇష్టారీతిన మళ్లీ విధుల్లో చేరతామంటే నిబంధనలు అంగీకరించబోవని ఆర్టీసీ ఇంఛార్జీ ఎండీ సునీల్ శర్మ పేర్కొన్నారు. ఫలితంగా రాష్ట్రవ్యాప్తంగా అన్ని డిపోల వద్ద ఉద్రిక్త పరిస్థితులు నెలకొన్నాయి. ఆర్టీసీ సమస్యను ముగించేందుకే రేపు మంత్రివర్గాన్ని సమావేశపరుస్తున్నట్లు స్పష్టం చేసిన సర్కార్... అవసరమైతే శుక్రవారం కూడా భేటీ కొనసాగించనున్నట్లు తెలిపింది.

అందరినీ కొనసాగిస్తారా లేదా?

ప్రస్తుతమున్న 49 వేల మంది సిబ్బందిని పూర్తి స్థాయిలో కొనసాగిస్తారా లేదా అనే విషయం మంత్రి వర్గం నిర్ణయించనుంది. ఇప్పుడు ఉద్యోగులు, సిబ్బందిని ఎలా తగ్గిస్తారనేది అందరి ప్రశ్న. ఇందుకోసం ఏం చేస్తారు... ఎలాంటి విధానాన్ని అనుసరిస్తారన్న విషయమై భిన్న ఊహాగానాలు వినిపిస్తున్నాయి. మరోవైపు నిర్బంధ లేదా స్వచ్ఛందంగా పదవీవిరమణ అమలు చేయవచ్చన్న వాదన వినిపిస్తోంది.

ప్రక్రియ పూర్తికి సర్కార్​ను సంప్రదిస్తారా లేదా ?

హైకోర్టు ఆదేశాల ప్రకారం కార్మిక శాఖ కమిషనర్ సమ్మెకు సంబంధించిన ప్రక్రియను పూర్తి చేయాల్సి ఉంటుంది. కార్మిక న్యాయస్థానానికి నివేదించాలా వద్దా అన్నది కమిషనరే తేల్చాల్సి ఉంది. కార్మిక న్యాయస్థానానికి నివేదిస్తే పరిష్కారం కోసం చాలా సమయం పడుతుందని అంటున్నారు. కార్మిక న్యాయస్థానానికి నివేదించకుండా ఈ ప్రక్రియ పూర్తి చేయాలంటే రాష్ట్ర ప్రభుత్వాన్ని సంప్రందించే నిర్ణయం తీసుకోవాల్సి ఉంటుందని అంటున్నారు. అప్పుడు సర్కార్ ఏం చేస్తుందనేది ఆసక్తికరం.

ఇవీ చూడండి : ఆర్టీసీ కార్మికుల ఆందోళనలు... అరెస్టులు