'బిడ్డే పోయింది.. ఆమె పింఛను నాకెందుకు..?'

ఏ కష్టం చేయకుండానే ఉచితంగా డబ్బులు వస్తుంటే ఎవరైనా వద్దంటారా...? కానీ అలా ఫ్రీగా వచ్చే డబ్బులు వద్దనుకొని అందరి అభినందనలు అందుకుంది సికింద్రాబాద్​ అడ్డగుట్టకు చెందిన పద్మ. చనిపోయిన తన కూతురి పేరిట వస్తోన్న పింఛన్​ నిలిపివేయాలని తహశీల్దార్​ కార్యాలయాన్ని ఆశ్రయించి వినతి పత్రం ఇచ్చి నిజాయితీని చాటుకుంది.

రెక్కాడితే గానీ డొక్కాడని జీవితం... ప్రతి రోజు నలుగురి ఇళ్ళల్లో పాచిపని చేసి కడుపు నింపుకునే వైనం... తనకంటూ సొంత ఇల్లు కూడా లేని ఒంటరి మహిళ... ఈ దుస్థితిలో ఉన్న వారు ఎవరైనా అప్పనంగా డబ్బులు వస్తుంటే వద్దనుకుంటారా...? ఏ కష్టం చేయకుండానే పూట గడవటాన్ని వదులుకుంటారా...? అకారణంగా వచ్చే డబ్బులను నిజాయితీగా వదులుకొని అందరి అభినందనలు అందుకుంది సికింద్రాబాద్​ అడ్డగుట్టకు చెందిన పద్మ అనే మహిళ.
చనిపోయిన తమవారి శవాలతో కూడా సహవాసం చేస్తూ అడ్డదారుల్లో పింఛన్​ డబ్బులు తీసుకుంటున్న ఈ రోజుల్లో... 'దివ్యాంగురాలైన నా కూతురు చనిపోయింది, తన పేరు మీద వస్తున్న పింఛన్​ నిలిపివేయండి సారూ' అని అర్జీ పెట్టుకొని మరీ.. నిజాయితీ చాటుకుంది ఆ మాతృమూర్తి.

దివ్యాంగురాలైన తన కూతురు చనిపోయినా, ఇంకా తన పేరిట పింఛన్​ వస్తోందని... దానిని నిలిపివేయండని మారేడుపల్లి తహసీల్దార్ సునీల్​​కు వినతిపత్రం ఇచ్చి అందరి అభినందనలు అందుకుంది సికింద్రాబాద్​ అడ్డగుట్టకు చెందిన పద్మ. కడుపేదరికంలో ఉండి కూడా నిజాయితీని చాటుకున్న పద్మను అభినందించారు సునీల్. భవిష్యత్​లో ఎటువంటి ఇబ్బంది కలిగినా తనను సంప్రదించాలని భరోసా ఇచ్చారు.

నిజాయితీకి గీటురాయి...
పద్మకు ఒక్కగానొక్క సంతానం అలేఖ్య... పుట్టుకతోనే అంగవైకల్యం... పాప జన్మించిన నాలుగేళ్ళకు భర్త జరిగిపోయాడు. కూతురి పేరిట ప్రతి నెలా దివ్యాంగుల కోటాలో పింఛన్​ వచ్చేది. ఆ డబ్బుతోనే ఇంటిని చక్కబెట్టుకొని.. పాపని అల్లారు ముద్దుగా చూసుకునేది. గతేడాది జూన్‌లో కూతురు కూడా చనిపోవటం వల్ల పద్మ ఒంటరిగా మారింది. అయినప్పటికీ అలేఖ్య పేరిట పింఛన్​ వస్తుండటంతో దానిని రద్దు చేయాలని మారేడుపల్లి తహశీల్దార్​ కార్యాలయంలో వినతి పత్రం సమర్పించింది.

చనిపోయిన కూతురు పేరు మీద వస్తున్న డబ్బులు సరికాదని... అసలైన లబ్ధిదారులకే అవి చేరాలని కోరుకుంటునట్లు తెలిపింది ఈ ఆదర్శమూర్తి.

ఇవీ చూడండి : ప్యారడైజ్ బిర్యానీ భలే బాగుంది: థాయ్​ ఉపప్రధాని