తెరాసలో సీఎల్పీ విలీనానికి రంగం సిద్ధం!

కాంగ్రెస్​ శాసనసభాపక్షాన్ని తెరాసలో విలీనం చేసేందుకు రంగం సిద్ధమైంది. నేడు లేదా రేపు ప్రత్యేకంగా సమావేశమై తెరాసలో విలీనం చేసేందుకు తీర్మానం చేయనున్నట్లు సమాచారం. పార్టీ విలీనానికి అవసరమైన సంఖ్యా బలం కూడా వీరికి ఉంది.

కాంగ్రెస్​ నుంచి తెరాసలోకి మారేందుకు నిర్ణయం తీసుకున్న ఎమ్మెల్యేలు అందుకు రంగం సిద్ధం చేసుకుంటున్నారు. నేడు లేదా రేపు ప్రత్యేకంగా సమావేశమై కాంగ్రెస్​ శాసనసభాపక్షాన్ని తెరాసలో విలీనం చేసేందుకు తీర్మానం చేయనున్నట్లు సమాచారం. తదనంతరం సభాపతి పోచారం శ్రీనివాస్​రెడ్డిని కలిసి లేఖ అందించాలని యోచిస్తున్నట్లు తెలిపారు. కాంగ్రెస్​కు ఈ సమాచారం అందడంతో అప్రమత్తమైంది. సభాపతికి ఫిర్యాదు చేయడంతో పాటు పార్టీకి రాజీనామా చేసినవారు కాక మిగిలిన ఎమ్మెల్యేలు తెరాసవైపు వెళ్లకుండా సంప్రదింపులు జరుపుతున్నట్లు సమాచారం.

కాంగ్రెస్​ ఎమ్మెల్యేలు రేగ కాంతారావు(పినపాక), హరిప్రియ(ఇల్లందు), చిరుమర్తి లింగయ్య(నకిరేకల్), సబితా ఇంద్రారెడ్డి(మహేశ్వరం), సురేందర్​(ఎల్లారెడ్డి), కందాల ఉపేందర్​ రెడ్డి(పాలేరు), వనమా వెంకటేశ్వర్​రావు(కొత్తగూడెం), సుధీర్​ రెడ్డి(ఎల్బీనగర్​), ఆత్రం సక్కు(ఆసిఫాబాద్​), బీరం హర్షవర్ధన్​ రెడ్డి(కొల్లాపూర్), గండ్ర వెంకటరమణారెడ్డి (భూపాలపల్లి) ఇప్పటికే పార్టీకి రాజీనామా చేసి తెరాసలో చేరుతామని ప్రకటించారు. మరి కొందరు ఎమ్మెల్యేలు తెరాసలో చేరేందుకు రంగం సిద్ధం చేసుకున్నట్లు సమాచారం. విలీనానికి 13 మంది ఎమ్మెల్యేలు అవసరం కాగా... దానికి అవసరమైన సంఖ్యాబలం ఈ వర్గానికి చేకూరినట్లు తెలిసింది.

ఇవీ చూడండి: బీసీ గురుకులాల్లో కొలువుల పండగ