మోడువారిన జీవనం... కట్టెల 'మోపు' పైనే భారం

వృద్ధాప్యంలోనూ స్వాభిమానంతో జీవించాలనుకుంది. కన్నకొడుకుకు భారం కాకూడదనుకుంది. మంచం పట్టిన కట్టుకున్నవాణ్ని కన్నకొడుకులాగా చూసుకుంటోంది. కట్టుకున్నవాడి కోసం కట్టెలు మోసి కూడబెడుతోంది ఆ ఇల్లాలు. తన ఆరోగ్యాన్ని పణంగా పెట్టి కుటుంబ బాధ్యతలను ఆనందంగా స్వీకరించింది అరవై ఏళ్ల వృద్ధురాలు హరీమున్నీసా.

జీవితంలోని ప్రతి అంకంలో భర్తకు తోడుగా ఉంటానన్న పెళ్లినాటి ప్రమాణాల్ని నిలబెట్టుకుంటోంది ఈ వృద్ధురాలు. ప్రమాదానికి గురై మంచం పట్టిన అరవై ఐదేళ్ల భర్తను కంటికి రెప్పలా కాపాడుకుంటోంది. ఇల్లు గడవడానికి ఆరుపదుల వయసులోనూ అహర్నిశలు కష్టపడుతోంది.

అనారోగ్యాన్ని లెక్కచేయకుండా..

ఆదిలాబాద్​ జిల్లా కేంద్రం సమీపంలోని రామ్​నగర్​లో హరీమున్నీసా, అబ్దుల్​ జమీల్​ దంపతులు నివాసముంటున్నారు. నెలరోజుల క్రితం అబ్దుల్​ ప్రమాదానికి గురై మంచం పట్టాడు. అతనికి కళ్లు సైతం అంతంత మాత్రంగానే కనిపిస్తాయి. హరీమున్నీసా కూడా కిడ్నీ సంబంధిత వ్యాధితో కొన్నాళ్లుగా బాధపడుతోంది.

భారం కాలేదు

ఈ దంపతులకు ఇద్దరు కుమారులుండగా... చిన్న కొడుకు కాలేయవ్యాధితో మరణించాడు. పెద్ద కుమారుడు ఆటో నడుపుతూ తన కుటుంబాన్ని పోషించుకుంటున్నాడు. ఇటువంటి గడ్డు పరిస్థితుల్లో కొడుకుకు భారం కాకూడదనుకుంది ఆ తల్లి.

ప్రతిరోజు 20 కిలోమీటర్లు నడిచి

రోజు ఉదయం 5 గంటలకు లేచి 20 కిలోమీటర్లకుపైగా దూరం కాలినడకన వెళ్లి అడవిలో ఎండిన కట్టెలను పోగు చేస్తుంది. మోపుగా చేసుకున్న కట్టెలను తలపై పెట్టుకుని తిరిగి ఆదిలాబాద్​ పట్టణంలో విక్రయిస్తుంది. ఆ డబ్బుతో మోడు వారిన వారి బతకు బండిని నడుపుతోంది.

స్వాభిమానం

ఆరుపదుల వయస్సులో... ఎవ్వరి మీదా ఆధారపడకుండా.. కట్టుకున్న వాడికి సపర్యలు చేస్తూ అద్దె ఇంట్లో జీవనం సాగిస్తోంది హరీమున్నీసా. వృద్ధాప్యంలోనూ సాయం కోసం చేయిచాచకుండా స్వాభిమానంతో బతుకుతున్న ఈ వృద్ధురాలికి ప్రభుత్వం చొరవ చూపి సాయం చేయాలని కోరుతున్నారు.

• ఇదీ చూడండి :'మీరు చేసే సాయం... నా పెనిమిటికి ప్రాణం పోస్తుంది'