పేద కుటుంబం.. కెరీర్ ఆరంభంలోనే గాయం. తొలి సీనియర్ జాతీయ ఛాంపియన్షిప్ మొదటి బౌట్లోనే నాకౌట్ ఓటమి.. ఇలా ఎన్నో అడ్డంకులు తనను వెనక్కి లాగాలని ప్రయత్నించినా దీపక్ పట్టు వదల్లేదు. రింగ్ దాటి బయటకు రాలేదు. సవాళ్లు ఎదురైనా ప్రతి సారి అత్యుత్తమ రీతిలో స్పందించాడు. కష్టాలను దాటి కలల దారిలో ప్రయాణం కొనసాగిస్తున్నాడు. పదకొండేళ్ల వయసులోనే అతనికి బాక్సింగ్పై ప్రేమ కలిగింది. చేతులకు గ్లోవ్స్ వేసుకుని... ప్రత్యర్థిపై పిడిగుద్దులు కురిపించాలనే కోరిక ఏర్పడింది. కానీ తన ఆర్థిక పరిస్థితి అడ్డుగా మారింది. అయినప్పటికీ కోచ్ షెరోన్ కారణంగా అప్పుడప్పుడూ బాక్సింగ్లో సాధన చేసే వీలు కలిగింది. కానీ 15 ఏళ్లు వచ్చేసరికి సరైన పోషకాహారం లేకపోవడం వల్ల ప్రాక్టీస్ చేయడం కష్టమైంది. నొప్పులతో శరీరం బాక్సింగ్ శిక్షణకు సహకరించలేదు. దీంతో ఆటను వదిలేసి కుటుంబానికి అండగా నిలుద్దామనుకున్నాడు. కానీ అతనిలోని బాక్సింగ్ ప్రతిభను గుర్తించిన షెరోన్.. తనను వదల్లేదు. స్నేహితుల సాయంతో డబ్బు సమకూర్చి మంచి ఆహారం అందేలా చూశాడు. రుణం తీసుకుని మరీ తన శిక్షణ కొనసాగేలా చూశాడు. కోచ్ నమ్మకాన్ని వమ్ము చేయని దీపక్ అంచెలంచెలుగా ఎదిగాడు.
"గడిచిన కొన్ని రోజుల్లో కల నిజమైనట్లుగా అనిపించింది. ప్రపంచంలోని కఠినమైన బాక్సింగ్ టోర్నీల్లో ఒకటైన స్ట్రాంజా స్మారక పోటీల్లో ఒలింపిక్ ప్రపంచ ఛాంపియన్ జోరోవ్ను ఓడించడం.. ఆ తర్వాత రజతం సొంతం చేసుకోవడం చాలా ప్రత్యేకంగా అనిపిస్తోంది. జీవితంలో ఎన్నో కష్టాలు అనుభవించా. కానీ బాక్సింగ్ నాకు అన్నీ ఇచ్చింది. ఇకపై స్వర్ణాలు గెలవడం పైనే నా దృష్టి. శ్రమ, అంకితభావంతో ఏదైనా సాధ్యమే అనే ఆత్మవిశ్వాసం నాకుంది."
- దీపక్ కుమార్ భోరియా, బాక్సర్
సహజంగానే: