భారత్ మరో అంతర్జాతీయ టోర్నీకి ఆతిథ్యమివ్వనుంది. 2020లో జరిగే ఫిఫా అండర్-17 మహిళల ప్రపంచకప్ను నిర్వహించనుంది. మియామీలో జరిగిన ఫిఫా కౌన్సిల్ సమావేశంలో ఈ నిర్ణయం తీసుకున్నారు.
'ఆల్ ఇండియా ఫుట్బాల్ ఫెడరేషన్' అధ్యక్షుడు ప్రఫుల్ పటేల్ ఈ విషయాన్ని ధ్రువీకరించారు. ఈ టోర్నీని విజయవంతం చేస్తామని ట్వీట్ చేశారు.
ఫుట్బాల్ చరిత్రలో రెండోసారి ఫిఫా టోర్నీకి ఆతిథ్యం ఇవ్వనుంది భారత్. ఇంతకుముందు 2017లో అండర్ 17 పురుషుల ఫిపా ప్రపంచకప్ని నిర్వహించింది. ఈ టోర్నీ విజయవంతం అయినందున మరోసారి ప్రతిష్ఠాత్మక టోర్నమెంట్ను నిర్వహించడానికి అవకాశం వచ్చింది.
ప్రస్తుతం అండర్ 17 భారత మహిళల జట్టు సౌత్ ఆసియన్ ఫుట్బాల్ టోర్నీలో ఆడుతోంది. ఇందులో ఇండియా జట్టుకు మంచి రికార్డు ఉంది. ఇప్పటికీ నాలుగు సార్లు ఈ కప్ను సొంతం చేసుకుంది.
