సౌథాంప్టన్ వేదికగా న్యూజిలాండ్తో జరుగుతోన్న డబ్ల్యూటీసీ ఫైనల్లో భోజన విరామ సమయానికి టీమ్ఇండియా 5 వికెట్ల నష్టానికి 130 పరుగులు చేసింది. క్రీజులో రిషభ్ పంత్(48 బంతుల్లో 28 పరుగులు), రవీంద్ర జడేజా(20 బంతుల్లో 12 పరుగులు) క్రీజులో ఉన్నారు. కివీస్ బౌలర్లలో జేమీసన్, సౌథీ తలో రెండు వికెట్లు తీసుకున్నారు. టీమ్ఇండియా ప్రస్తుతం 98 పరుగుల ఆధిక్యంలో ఉంది.
కోహ్లీ వెంటనే..
ఓవర్ నైట్ స్కోరు 64/2తో బరిలోకి దిగిన టీమ్ఇండియాకు ఆదిలోనే ఎదురుదెబ్బ తగిలింది. ఇన్నింగ్స్ ప్రారంభమైన కొద్దిసేపటికే కెప్టెన్ విరాట్ కోహ్లీ(29 బంతుల్లో 13 పరుగులు).. ఓ అనవసర షాట్కు పోయి కీపర్ క్యాచ్గా ఔటయ్యాడు. స్కోరు బోర్డులో మరో పరుగు చేరిందో లేదో నయా వాల్ పుజారా(80 బంతుల్లో 15 పరుగులు) కూడా పెవిలియన్ చేరాడు. వీరిద్దరి వికెట్లు జేమీసన్ ఖాతాలో చేరాయి.
అనంతరం క్రీజులోకి వచ్చిన వైస్ కెప్టెన్ అజింక్య రహానె(40 బంతుల్లో 15 పరుగులు) కొద్దిసేపు క్రీజులో ఉన్నప్పటికీ.. పెద్దగా ఆకట్టుకోలేకపోయాడు. బాధ్యతరాహిత్య షాట్కు పోయి బౌల్ట్ బౌలింగ్లో కీపర్ క్యాచ్గా వెనుదిరిగాడు. దీంతో 109 పరుగులకే సగం వికెట్లను కోల్పోయింది టీమ్ఇండియా. తర్వాత బ్యాటింగ్కు దిగిన జడేజా.. రిషభ్ పంత్కు సహకరిస్తున్నాడు.
