ముంబయి గెలిచింది.. హైదరాబాద్​ ప్లే ఆఫ్​కు వెళ్లింది

వాంఖడే వేదికగా జరిగిన మ్యాచ్​లో కోల్​కతాపై 9 వికెట్ల తేడాతో ముంబయి విజయం సాధించింది. 134 పరుగుల లక్ష్యాన్ని 16.1 ఓవర్లలోనే ఛేదించింది. ఈ మ్యాచ్​లో కోల్​కతా​ ఓడిపోవడం.. హైదరాబాద్​ను ప్లేఆఫ్​కు అర్హత సాధించేలా చేసింది.

సొంతగడ్డపై జరిగిన చివరి లీగ్​ మ్యాచ్​లో ముంబయి ఇండియన్స్ విజయం సాధించింది. కోల్​కతా నిర్దేశించిన 134 పరుగుల లక్ష్యాన్ని 16.1 ఓవర్లలోనే ఛేదించింది. ముంబయి జట్టు సమష్టిగా రాణించింది. హార్దిక్ పాండ్య మ్యాన్ ఆఫ్ ది మ్యాచ్​గా నిలిచాడు.

134 పరుగుల లక్ష్యంతో బరిలోకి దిగింది ముంబయి ఇండియన్స్​. తొలి వికెట్​కు 46 పరుగుల భాగస్వామ్యం నెలకొల్పారు ఓపెనర్లు రోహిత్ - డికాక్. అనంతరం 30 పరుగుల వ్యక్తిగత స్కోరు వద్ద మొదటి వికెట్​గా ఔటయ్యాడు డికాక్.

తర్వాత క్రీజులోకి వచ్చిన సూర్య కుమార్ యాదవ్​తో కలిసి రోహిత్ శర్మ లాంఛనాన్ని పూర్తి చేశాడు. ఈ క్రమంలో రోహిత్ శర్మ 55 పరుగులతో నాటౌట్​గా నిలిచాడు. చివరి వరకు రోహిత్​కు సహకారమందించిన సూర్యకుమార్ 27 బంతుల్లో 46 పరుగులతో ఆకట్టుకున్నాడు.

కోల్​కతా బౌలర్లలో సందీప్ వారియర్ మాత్రమే వికెట్ తీయగలిగాడు. మిగతా బౌలర్లు పరుగులు సమర్పించారే తప్ప బ్యాట్స్​మెన్​ను ఔట్ చేయలేకపోయారు.

అంతకు ముందు టాస్ ఓడి బ్యాటింగ్​కు దిగింది కోల్​కతా. తొలి వికెట్​కు 49 పరుగులు భాగస్వామ్యం నెలకొల్పారు ఓపెనర్లు లిన్-శుభ్​మన్. అనంతరం 41 పరుగులు చేసిన లిన్.. హార్దిక్ పాండ్య బౌలింగ్​లో వెనుదిరిగాడు.

ఆ తర్వాత వచ్చిన బ్యాట్స్​మెన్​లో చివరి వరకు నిలిచిన ఊతప్ప 40 పరుగులే చేయగలిగాడు. నితీశ్ రానా 26 పరుగులు చేసి ఔటయ్యాడు. మిగతా వారందరూ స్వల్ప స్కోర్లకే పెవిలియన్ బాట పట్టారు.

అద్భుత​ ప్రదర్శన చేసిన ముంబయి బౌలర్లు.. కోల్​కతాను తక్కువ స్కోరుకే కట్టడి చేశారు. మలింగ మూడు వికెట్లు తీయగా... హార్దిక్, బుమ్రా తలో రెండు వికెట్లు తీశారు.