జోరు మీదున్న చెన్నైని ఓడించిన సన్రైజర్స్ ఈ మ్యాచ్లో ఆత్మవిశ్వాసంతో బరిలోకి దిగనుంది. బెంగళూరుతో జరిగిన మ్యాచ్లో దాదాపు విజయం అంచులవరకు వెళ్లి పరాజయం పాలైంది కోల్కతా నైట్ రైడర్స్. నేడు ఈ రెండింటి మధ్య మ్యాచ్ జరుగనుంది. ఉప్పల్ వేదికగా సాయంత్రం 4 గంటలకు మ్యాచ్ ప్రారంభం కానుంది.
చెరో నాలుగు మ్యాచ్ల్లో గెలిచి సమాన పాయింట్లతో ఉన్నాయి ఇరు జట్లు. ఈ మ్యాచ్ గెలిచి ప్లే ఆఫ్కు మార్గం సుగమం చేసుకోవాలనుకుంటున్నాయి. ఇప్పటికే ఈ రెండింటి మధ్య జరిగిన తొలి మ్యాచ్లో కోల్కతా విజయం సాధించింది. సొంతగడ్డపై మ్యాచ్ను ఎలాగైనా గెలవాలని భావిస్తోంది హైదరాబాద్.
కోల్కతా నైట్ రైడర్స్..
ఇప్పటికే హ్యాట్రిక్ ఓటములతో ఢీలా పడిన కోల్కతా ఈ మ్యాచ్పైనే ఆశలు పెట్టుకుంది. గత మ్యాచ్లో బెంగళూరుపై విజయం దక్కినట్టే దక్కి దూరమైంది. ఆండ్రీ రసెల్(65), నితీశ్ రాణా (85) విజృంభించి జట్టును గెలుపు అంచుల వరకు చేర్చారు. కోల్కతా బ్యాట్స్మెన్లో రాబిన్ ఉతప్ప, శుభ్మన్ గిల్ నిలకడగా రాణిస్తున్నారు. దినేశ్ కార్తీక్ సత్తా చాటాల్సిన అవసరం ఉంది. మొన్నటివరకు బౌలర్లు ఆకట్టుకున్నా గత కొన్ని మ్యాచ్ల్లో ధారాళంగా పరుగులిస్తున్నారు.
సన్రైజర్స్ హైదరాబాద్...
హ్యాట్రిక్ ఓటముల అనంతరం చెన్నైపై విజయం సాధించి ఆత్మవిశ్వాసంతో ఉంది హైదరాబాద్ జట్టు. ఓపెనర్లు, బౌలర్లు రాణిస్తున్నా... మిడిల్ ఆర్డర్ పేలవంగా ఉంది. దీనిపై దృష్టిసారించాల్సి ఉంది. కోల్కతాతో జరిగిన తొలిమ్యాచ్లో చివరి వరకు వచ్చి ఓటమిపాలైంది సన్రైజర్స్. ఈ మ్యాచ్లో సత్తాచాటాలని భావిస్తోంది. చెన్నైతో జరిగిన మ్యాచ్లో అన్ని విభాగాల్లో ఆకట్టుకున్న హైదరాబాద్... నైట్రైడర్స్పైనా ఇదే ప్రదర్శన చేయాలని ఆశిస్తోంది. మరోసారి ఓపెనర్లు వార్నర్, బెయిర్స్టో పైనే ఆశలు పెట్టుకుంది హైదరాబాద్ జట్టు. కెప్టెన్ విలియమ్సన్ ఫామ్లోకి రావాల్సిఉంది. అలాగే మిడిల్ ఆర్డర్లో హుడా, యూసుఫ్ పఠాన్ సత్తా చాటాల్సి ఉంది. బౌలర్లలో ఖలీల్ అహ్మద్, రషీద్ ఖాన్, సందీప్ శర్మ ఆకట్టుకునే ప్రదర్శన చేస్తున్నారు. భువనేశ్వర్ తన సామర్థ్యం మేరకు సత్తా చాటాల్సి ఉంది.
జట్ల అంచనా...
కోల్కతా నైట్ రైడర్స్
సునిల్ నరైన్, దినేశ్ కార్తీక్ (కెప్టెన్, కీపర్), పీయుష్ చావ్లా, రాబిన్ ఉతప్ప, క్రిస్ లిన్, ఆండ్రీ రసెల్, కుల్దీప్ యాదవ్, నితీష్ రాణా, ప్రసిద్ధ్ కృష్ణ, శుభ్మన్ గిల్, హారీ గుర్నే.
సన్ రైజర్స్ హైదరాబాద్
విలియమ్సన్(కెప్టెన్), వార్నర్, బెయిర్ స్టో(కీపర్), విజయ్ శంకర్, సందీప్ శర్మ, నదీమ్, దీపక్ హుడా, రషీద్ ఖాన్, ఖలీల్ అహ్మద్, యూసుఫ్ పఠాన్, భువనేశ్వర్ కుమార్
