'అప్పుడు.. ఒక జత షూ, రెండు టీషర్టులే ఉండేవి'

ఐపీఎల్​లోకి రాకముందుకు టీమిండియా స్టార్ బౌలర్ జస్​ప్రీత్​ బుమ్రా దగ్గర సరైన బట్టలు, షూలు కూడా లేవని తెలిపారు అతని తల్లి దల్జీత్. ఈ వీడియోను ట్విట్టర్లో షేర్ చేసింది ముంబయి ఇండియన్స్ జట్టు.

జస్​ప్రీత్​ బుమ్రా.. ప్రస్తుతం ప్రపంచంలోనే స్టార్ బౌలర్. అంతర్జాతీయ క్రికెట్, ఐపీఎల్ వాణిజ్య ఒప్పందాలతో కోట్ల రూపాయలు సంపాదిస్తున్నాడు. అయితే యుక్త వయసులో అతడికి సరైన బట్టలు, షూలు కూడా ఉండేవి కావట. ఈ ఇబ్బందుల గురించి బుమ్రా, అతడి తల్లి వెల్లడించిన ఓ వీడియోను ముంబయి ఇండియన్స్ ట్విట్టర్లో షేర్ చేసింది.

"మేం అప్పుడు ఏం కొనాలన్నా ఇబ్బందే. క్రికెట్‌ ఆడటం మొదలయ్యాక నా దగ్గర ఒక జత షూ, రెండు టీషర్టులు మాత్రమే ఉండేవి. వాటినే మళ్లీ మళ్లీ ఉతుక్కొని వేసుకునేవాడిని" -జస్​ప్రీత్​ బుమ్రా, టీమిండియా పేసర్

"మొదటి సారి బుమ్రా ఐపీఎల్​లో ఆడుతున్నప్పుడు టీవీలో చూసిన నేను.. ఏడవకుండా ఉండలేకపోయా. శారీరకంగానే కాకుండా ఆర్థికంగానూ బుమ్రా ఎంతో కష్టపడ్డాడు. ఒకసారి దుకాణంలో ఖరీదైన షూలు చూసి ఎప్పటికైనా వాటిని కొంటానన్నాడు. ఇప్పుడు బుమ్రా దగ్గర ఎన్నో రకాల షూలు ఉన్నాయి" - దల్జీత్, బుమ్రా తల్లి

2013లో ఐపీఎల్లో అరంగేట్రం చేశాడు బుమ్రా. ఆరేళ్లలోనే ప్రపంచ నంబర్​ వన్ బౌలర్​గా ఎదిగాడు. గాయం కారణంగా దక్షిణాఫ్రికా సిరీస్​కు దూరంగా ఉన్నాడు. ప్రస్తుతం లండన్​లో చికిత్స తీసుకుంటున్నాడు.

ఇదీ చదవండి: సిరీస్​పై కన్నేసిన భారత్.. విజయం కోసం సఫారీల చూపు!