బంతి ఇప్పుడు ధోనీ కోర్టులో.. నిర్ణయం ఎటువైపో..!

తాజాగా బీసీసీఐ ప్రకటించిన ఆటగాళ్ల వార్షిక కాంట్రాక్ట్ జాబితాలో మహేంద్రసింగ్ ధోనీకి చోటు దక్కలేదు. ఈ కారణంగా ధోనీ త్వరలోనే రిటైర్మెంట్ ప్రకటిస్తాడన్న వార్తలు వినిపిస్తున్నాయి.

ప్రపంచకప్​ తర్వాత జట్టుకు దూరంగా ఉన్నాడు మహేంద్రసింగ్ ధోనీ. అప్పటి నుంచి ఏ సిరీస్​లోనూ పాల్గొనలేదు. మెగాటోర్నీకి ముందు నుంచీ ప్రదర్శన చెప్పుకోదగ్గ స్థాయిలో లేదు. ఫలితంగా ధోనీ తప్పుకోవాలంటూ విమర్శలు వచ్చాయి. తాజాగా బీసీసీఐ ప్రకటించిన ఆటగాళ్ల వార్షిక ఒప్పంద జాబితాలోనూ ధోనీకి చోటు దక్కలేదు. ఈ కారణంగా మరోసారి రిటైర్మెంట్ వార్తలు చక్కర్లు కొడుతున్నాయి.

ఈ ఏడాది జరిగే ఐపీఎల్​లో ధోనీ చెన్నె సూపర్ కింగ్స్​కు సారథ్యం వహించనున్నాడు. ఈ లీగ్​లో ప్రదర్శన ఆధారంగా ధోనీ జట్టులోకి వచ్చే అవకాశముందని కోచ్ రవిశాస్త్రి తెలిపాడు. త్వరలోనే వన్డే ఫార్మాట్​కు మహీ వీడ్కోలు పలుకుతాడని స్పష్టం చేశాడు.

ధోనీ

"మహీతో నేను ఏకాంతంగా సంభాషించాను. ఏం మాట్లాడామన్నది మా ఇద్దరి మధ్యే ఉంటుంది. అతడు టెస్టు కెరీర్‌ను ముగించాడు. బహుశా త్వరలోనే వన్డేలకు వీడ్కోలు చెప్పేస్తాడు. అతనికప్పుడు టీ20లు మాత్రమే మిగిలుంటాయి. అతడు కచ్చితంగా ఐపీఎల్‌ ఆడతాడు. ఒక్కటి మాత్రం నిజం. తనకు తానుగా ధోనీ జట్టుకు భారమవ్వడు. కానీ అతడు ఐపీఎల్‌లో అద్భుతంగా ఆడితే మాత్రం పరిస్థితి వేరుగా ఉంటుంది."
-రవిశాస్త్రి, టీమిండియా కోచ్

కానీ ఇప్పుడు ధోనీ రిటైర్మెంట్ ప్రకటించడం సమంజసం కాదని కొందరి వాదన. దగ్గర్లో టీ20 ప్రపంచకప్ ఉన్న కారణంగా ఈ టోర్నీలో మహీ అనుభవం జట్టుకు చాలా అవసరమని క్రికెట్ పండితులు అంటున్నారు. ఇది ధోనీ వ్యక్తిగత అభిప్రాయమని.. అతడే దీనిపై నిర్ణయం తీసుకోవాలని మరికొందరు చెబుతున్నారు. ఏదిఏమైనప్పటికీ బీసీసీఐ మాత్రం ధోనీ అభిమానులకు ఓ స్పష్టమైన సూచన చేసింది.

ధోనీ

టీమిండియా కెప్టెన్​గా ధోనీకి ఘనమైన రికార్డు ఉంది. ఐసీసీ వన్డే ప్రపంచకప్, టీ20 ప్రపంచకప్​, ఛాంపియన్స్ ట్రోఫీ అందించిన ఏకైక సారథిగా ఘనత వహించాడు మహీ. ఇప్పటివరకు ధోనీ 90 టెస్టులు, 350 వన్డేలు, 98 టీ20లు ఆడాడు. మొత్తంగా 17 వేల పరుగులు సాధించాడు. కీపర్​గా 829 ఔట్లలో పాలుపంచుకున్నాడు.

ఇవీ చూడండి.. బీసీసీఐ వార్షిక కాంట్రాక్టు జాబితాలో ధోనీకి దక్కని చోటు