కోలీవుడ్ ప్రముఖ నటుడు, దర్శకుడు రాఘవ లారెన్స్ సినిమాలతో పాటు సేవా కార్య‌క్ర‌మాల ద్వారా అభిమానులకు ఎప్పుడూ గుర్తుంటాడు. తాజాగా ఇతడు ఓ ఆసక్తికర ప్రకటన చేశాడు. హిందూ, ముస్లిం, క్రైస్తవులు ఒకే దగ్గర ప్రార్థనలు చేసుకునేలా ఓ ఆలయం నిర్మించనున్నట్లు తెలిపాడు. తాజాగా శ్రీ రాఘవేంద్ర స్వామి పుట్టినరోజు సందర్భంగా ఈ విషయం సామాజిక మాధ్యమాల వేదికగా వెల్లడించాడు. అయితే దీనిపై నెటిజన్ల నుంచి భిన్నాభిప్రాయాలు వ్యక్తమవుతున్నాయి.
కోటిన్నరతో ఇళ్ల నిర్మాణం..
లారెన్స్ చారిటబుల్‌ ట్రస్ట్‌ ఆధ్వర్యంలో ట్రాన్స్‌జెండర్లకు ఇళ్లు కట్టించేందుకు ప్రణాళికనూ రచించాడీ స్టార్ దర్శకుడు. అయితే ఈ మంచిపని కోసం ఇటీవల భారీ విరాళం అందించాడు బాలీవుడ్ హీరో అక్షయ్ కుమార్. దాదాపు రూ.1.5 కోట్ల సాయం చేశాడు. ఈ ట్రస్ట్‌ పేరుతో విద్య, చిన్నారుల కోసం వసతిగృహాలు, అంతేకాకుండా దివ్యాంగుల సంక్షేమం కోసం కూడా ఎన్నో కార్యక్రమాలూ నిర్వహిస్తున్నాడు లారెన్స్.
ప్రస్తుతం ఇతడు 'కాంచన' హిందీ రీమేక్‌ 'లక్ష్మీ బాంబ్‌'ను తెరకెక్కిస్తున్నాడు. హీరో, హీరోయిన్లుగా అక్షయ్ కుమార్, కియారా అడ్వాణీ నటిస్తున్నారు. వేసవిలో ఈ సినిమా ప్రేక్షకుల ముందుకు రానుంది.
