కెరీర్‌ ఆరంభంలోనే విభిన్న కథా చిత్రాల్లో నటిస్తున్నందుకు ఎంతో సంతోషంగా ఉన్నాన్నంటోంది హీరోయిన్ నభా నటేశ్. 'నన్ను దోచుకుందువటే' చిత్రంతో తెలుగుతెరకు పరిచమైన ఈ భామ.. గతేడాది 'ఇస్మార్ట్ శంకర్'తో బ్లాక్‌బస్టర్‌ విజయాన్ని తన ఖాతాలో వేసుకుంది. ప్రస్తుతం ఆమె.. రవితేజతో 'డిస్కోరాజా'లో నటించింది. ఈ 24న ప్రేక్షకుల ముందుకు రానుందీ చిత్రం. ఈ సందర్భంగా విలేకర్లతో ముచ్చటించింది నభా. ఆ విశేషాలివే
'ఇస్మార్ట్ కిక్‌'
2019.. నాకు చాలా అద్భుతంగా ఉంది. కెరీర్‌ పరంగా అది నాకు బెస్ట్ ఇయర్‌ అనే చెప్పాలి. గతేడాది విడుదలైన 'ఇస్మార్ట్ శంకర్'తో బ్లాక్‌బస్టర్‌ విజయాన్ని సొంతం చేసుకున్నా. ఇప్పటికీ ఆ కిక్‌ నుంచి బయటకు రాలేకపోతున్నా. ఎందుకంటే ఎక్కడికి వెళ్లినా 'ఇస్మార్ట్ శంకర్'లోని డైలాగ్స్‌, డ్యాన్స్‌ చేయమని అడుగుతున్నారు.
రవితేజతో ఉంటే
రవితేజకు నేను పెద్ద అభిమానిని. ఆయన నటన, ఎనర్జీ, కామెడీ టైమింగ్‌ వేరే లెవల్‌లో ఉంటాయి. ఆయన నటించిన చిత్రాల్లో 'విక్రమార్కుడు' నా ఫేవరెట్‌ మూవీ. అలాగే 'కిక్‌' సినిమా కూడా ఇష్టమే. అభిమానించే వ్యక్తితో నటించే అవకాశం వస్తే ఆ సంతోషాన్ని మాటల్లో చెప్పలేం. ఆయన ఎప్పుడూ పాజిటివ్గా ఉంటారు. మేమిద్దరం కలిస్తే ఫుడ్‌, లైఫ్‌, ఆయన తోటలో పండే పండ్ల గురించి మాట్లాడుకుంటుంటాం.
పాయల్‌తో నో సీన్స్‌
ఇందులో నేనొక బ్యాంక్‌ ఉద్యోగినిగా కనిపిస్తాను. వాహనాలకు ఇచ్చిన లోన్స్‌ను కలెక్ట్‌ చేస్తూంటాను. నేను పోషించిన పాత్ర నా రియల్‌ లైఫ్‌కు దగ్గర ఉంటుంది. ఎందుకంటే ఈ రోల్లో ఎమోషన్స్‌కు ఎక్కువ విలువనిస్తుంది. ప్రస్తుత కాలంలో స్వతంత్ర భావాలు కలిగిన ఓ అమ్మాయి ఎలా ఉంటుందో ఇందులో నా క్యారెక్టర్‌ అలా ఉంటుంది. పాయల్‌కు నాకు మధ్య ఎలాంటి సన్నివేశాలు ఉండవు. నేను చేసిన సన్నివేశాలన్నీ రవితేజ, సత్యం రాజేశ్‌, నరేశ్‌తోనే ఉంటాయి.
చాలా సంతోషంగా ఉన్నా
ఒక నటిగా నేను అన్ని రకాల పాత్రల్లో నటించాలనుకుంటున్నాను. అలాగే ఇప్పటివరకూ తెలుగులో నటించిన మూడు సినిమాల్లో మూడు విభిన్న పాత్రలు పోషించాను. 'డిస్కోరాజా'లో నేను పోషించిన పాత్ర ప్రతిఒక్కరికీ తప్పకుండా నచ్చుతుందని అనుకుంటున్నాను. కెరీర్‌ ఆరంభంలోనే ఇలాంటి మంచి పాత్రల్లో నటించడం నాకెంతో సంతోషంగా ఉంది.