ప్రస్తుతం భారతీయ చిత్రసీమలో అత్యధిక ఆదాయం సంపాదిస్తోన్న సినీతారల్లో యాక్షన్‌ హీరో అక్షయ్కుమార్ అగ్ర స్థానంలో ఉంటాడు. గతేడాది ఫోర్బ్స్‌ విడుదల చేసిన జాబితాలో సంవత్సరానికి దాదాపు రూ.450 కోట్లు సంపాదిస్తున్నట్టు తేలింది. నిజానికి బాలీవుడ్‌లో ఆయన పారితోషికం ఖాన్‌ల త్రయంతో పోల్చితే తక్కువే అని చెప్పొచ్చు. కానీ, వాళ్లు ఏడాదికి ఒక్క చిత్రంతో నెట్టుకొస్తుంటే.. అక్షయ్ మాత్రం సంవత్సరానికి నాలుగు చిత్రాలకు తక్కువ కాకుండా చేస్తున్నాడు. దీనికి తోడు ఇటీవల కాలంలో అక్షయ్ చిత్రాల సక్సెస్‌ రేటు కూడా బాగా ఉండటం వల్ల ఆయన ఆదాయం ఎక్కువగా ఉంది.
మరోవైపు వాణిజ్య ప్రకటనల ద్వారా మరింత సంపదను ఆర్జిస్తున్నాడు. ఇప్పుడీ హీరో ఖాతాలో పారితోషికం పరంగానూ ఓ అరుదైన రికార్డు చేరబోతున్నట్లు బాలీవుడ్‌ వర్గాల సమాచారం. త్వరలో ఆనంద్ ఎల్.రాయ్‌తో ఆయన చేయబోయే కొత్త చిత్రం కోసం దాదాపు రూ.120 కోట్ల పారితోషికం అందుకోనున్నాడట.