ప్రకృతికి ప్రతిరూపాలు ఈ కళాఖండాలు

ఈ ఎగ్జిబిషన్​లోకి అడుగు పెడితే మరో లోకానికి వెళ్లినట్లు అనిపిస్తుంది. టేట్​ మ్యూజియంలో ప్రదర్శిస్తున్న ఆ కళాఖండాల మాయాజాలంలో ప్రతీది పర్యావరణ సంబంధంగా ప్రకృతిని తలపించేలా ఉంటుంది.

ఇక్కడ మీరు చూస్తున్నది లండన్​ టేట్ ఎగ్జిబిషన్. ఇందులో మీకు కనిపిస్తున్న కళాకృతులన్నీ ప్రకృతి సంబంధితమే. వీటిని సృష్టించిన వ్యక్తి ఓలాఫర్​ ఎలిసన్​.

ఇందులోకి అడుగు పెట్టేవాళ్లు ఇంకో లోకానికి వెళ్లిన అనుభూతి పొందుతారు. టేట్​లో ప్రదర్శిస్తున్న ఈ కళాఖండాలు మిమ్మల్ని ప్రకృతికి మరింత దగ్గరగా తీసుకెళ్తాయి. వాన చినుకుల్లా చిందే నీరు, పాచితో కప్పిన గోడ, అబ్బురపరిచే ఇంద్రధనస్సు, రంగు రంగు నీడలు ప్రతిబింబించేలా ఎగ్జిబిషన్​ లో ఏర్పాటు చేశారు. ప్రకృతిలో మనిషి ఆస్వాదించగలిగే ప్రతి అనుభూతిని ఇక్కడ పొందవచ్చు.

ఈ ఎగ్జిబిషన్​ను "రియల్​ లైఫ్"​ అని అనడానికి కారణం ఉంది. ఈ మ్యూజియంలోకి అడుగుపెట్టే వాళ్లకు నేను ఒకటి చెప్పాలనుకుంటున్నాను. ఇందులోకి వస్తే మీరు వేరే ప్రపంచంలోకి వెళ్తున్నారనుకుంటే పొరపాటు. ఎందుకంటే ఇది మిమ్మల్ని ప్రకృతికి ఇంకా దగ్గరగా తీసుకెళ్తుంది.

-ఓలాఫర్​ ఎలిసన్

ప్రకృతిని మనం ఎలా అర్థం చేసుకుంటున్నాము, చుట్టూ ఉన్న పరిసరాలతో ఎలా మమేకమవుతున్నాము అనే అంశాల ఆధారంగా విభిన్న కళాఖండాలను సృష్టించానని ఓలాఫర్ తెలిపారు.

పర్యావరణంలో వస్తున్న మార్పుల వల్ల 1990లో గ్రీన్​ల్యాండ్​లో​ మంచు గడ్డలు కరుగుతున్న చిత్రాలను కెమెరాలో బంధించి 42 చిత్రాలను ప్రదర్శనకు ఉంచారు. మళ్లీ ఈ ఏడాది వేసవికాలంలో వాటిని చిత్రీకరించి రెండిటిని పక్కపక్కనే పెట్టి మనిషి స్వార్థం వల్ల ప్రకృతి ఎంత విపత్తులో ఉందో చెప్పాలనుకుంటున్నట్లు వివరించారు. ఈ ప్రదర్శన ఈ ఏడాది జులై 5 నుంచి 2020 జనవరి వరకు జరుగుతుంది.

ఇదీ చూడండి:ఎలక్ట్రిక్ కారు... సొంతంగా తయారు చేశారు!