పిల్లలకు నిద్ర తక్కువైతే ఎన్నో సమస్యలు..!

సరిగా నిద్రలేకపోవడం వల్ల చిన్నపిల్లల్లో మానసిక సమస్యలు తలెత్తుతాయని ఓ నివేదిక తెలిపింది. ఇటీవల 11 వేల మంది పిల్లల మెదడు పనితీరుపై పరిశోధనలు చేశారు శాస్త్రవేత్తలు. 6 నుంచి 11 సంవత్సరాల వయసున్న వారు రోజులో 9 నుంచి 12 గంటలు విశ్రాంతి తీసుకోవాలని సూచించారు.

చిన్నపిల్లలకు సరైన నిద్ర లేకపోతే వారిలో కుంగుబాటు, ఆందోళన, ఆలోచన లోపించడం వంటి సమస్యలు తలెత్తుతాయని తాజాగా ఓ నివేదిక తెలిపింది. తగినంత నిద్ర లోపిస్తే చిన్నారుల్లో నాడీ వ్యవస్థపై ప్రభావం పడుతుందని హెచ్చరించారు.

సరైన నిద్ర మెదడులోని నరాల అనుసంధానానికి తోడ్పడుతుందని, పిల్లలకు ఇది చాలా ముఖ్యమైనదని పరిశోధకులు వెల్లడించారు. ఫలితంగా మెదడు వేగంగా పని చేస్తుందని చెబుతున్నారు. బ్రిటన్​లో జరిపిన ఈ అధ్యయనంలో భాగంగా 9 నుంచి 11 సంవత్సరాల వయసు ఉన్న 11వేల మంది పిల్లల మెదడు పనితీరును పరిశీలించారు శాస్త్రవేత్తలు.

తక్కువగా నిద్రపోయినవారికి సంవత్సరం తర్వాత నిరాశ, నిస్పృహ సమస్యలు తలెత్తుతాయని అధ్యయనంలో తేలింది. 6 నుంచి 12 సంవత్సరాల వయసున్న పిల్లలు రోజులో 9 నుంచి 12 గంటలు విశ్రాంతి తీసుకోవాలని నిపుణులు సూచించారు.

ఏడు గంటల కంటే తక్కువగా నిద్రపోతున్న పిల్లల్లో 53 శాతం ప్రవర్తనలో సమస్యలు తలెత్తుతున్నాయని, 9 నుంచి 11 గంటలు నిద్రపోతున్న పిల్లల్లో ఆలోచన ధోరణి మెరుగుపడిందని పరిశోధకులు స్పష్టం చేశారు. చిన్నారుల్లో జ్ఞానం, మానసిక ఆరోగ్యం మెరుగుపడటంలో నిద్ర ప్రముఖ పాత్ర పోషిస్తుందని తెలిపారు.