కరోనా విలయతాండవం చేస్తున్న వేళ.. ప్రపంచమంతా కొవిడ్‌ వ్యాక్సిన్ కోసం ఆశగా ఎదురుచూస్తోంది. ఇప్పటికే ఆయా దేశాల్లో వ్యాక్సిన్లపై ప్రయోగాలు ముమ్మరంగా కొనసాగుతున్నాయి. ఈ నేపథ్యంలో మెడికల్‌ జర్నల్ 'ద లాన్సెట్' ఎడిటర్ పెట్టిన ఓ ట్వీట్ తాజాగా సంచలనం సృష్టిస్తోంది. ఎందుకంటే వ్యాక్సిన్ రేసులో ముందున్న ఆక్స్ఫర్డ్ టీకా అధ్యయన ఫలితాలను ప్రకటించబోతున్నట్లు ఆయన పోస్ట్‌ చేశారు. దీంతో వైద్యరంగంతోపాటు సామాన్యుల్లోనూ ఆ ఫలితాలపై సర్వత్రా ఆసక్తి నెలకొంది.
'రేపు.. వ్యాక్సిన్.. జస్ట్‌ సేయింగ్‌' అంటూ లాన్సెట్ జర్నల్ ఎడిటర్ రిచర్డ్‌ హార్టన్‌ నిన్న ట్వీట్ పెట్టారు. దీంతో ఆక్స్ఫర్డ్ ఆస్ట్రాజెనెకా కొవిడ్‌-19 వ్యాక్సిన్ ఫేజ్‌-I క్లినికల్‌ ట్రయల్స్‌ డేటాను నేడు ఆ జర్నల్ ప్రచురించనున్నట్లు తెలుస్తోంది. మానవ పరీక్షల తర్వాత ఈ టీకా కరోనా వైరస్‌కు వ్యతిరేకంగా డబుల్‌ ప్రొటెక్షన్‌ ఇవ్వగలదని ఆక్స్ఫర్డ్ పరిశోధకుల బృందం చెప్పినట్లు యూకే మీడియా గత గురువారం ప్రకటించింది.