కరోనా వైరస్కు సంబంధించి చైనాలో రోజూవారిగా నమోదవుతున్న కేసులు సంఖ్య స్థిరంగానే ఉన్నట్లు ప్రపంచ ఆరోగ్య సంస్థ(డబ్ల్యూహెచ్ఓ) స్పష్టం చేసింది. ఇది మంచి వార్తే అయినప్పటికీ.. వైరస్ ప్రభావం అత్యున్నత స్థాయికి చేరిందని ఇప్పుడే ఓ అంచనాకు రాలేమని తెలిపింది.
"హుబే నగరంలో నమోదవుతున్న కేసుల సంఖ్య స్థిరంగా ఉంది. నాలుగు రోజుల వ్యవధిలో కేసుల సంఖ్య అంతగా పెరగలేదు. ఈ మంచి వార్త... నియంత్రణ చర్యల ఫలితమే కావచ్చు. కానీ దీనిపై ఇప్పుడే ఓ అంచనాకు రావడం తొందరపాటే అవుతుంది.''
-మైఖేల్ ర్యాన్, డబ్ల్యూహెచ్ఓ హెల్త్ ఎమర్జెన్సీ ప్రోగ్రామ్ అధ్యక్షుడు
ట్రోల్స్ పైనా పోరాటం
చైనాలో వైరస్ సోకిన వ్యక్తులకు చికిత్స చేయడానికి ఆటంకాలు ఎదురవుతున్నాయన్న వార్తలను ఖండించారు డబ్ల్యూహెచ్ఓ చీఫ్ టెడ్రోస్ అధనామ్ గెబ్రెయెసస్. చైనాకు పంపనున్న అంతర్జాతీయ నిపుణుల బృందానికి సంబంధించి అక్కడి అధికారులతో చర్చించినట్లు తెలిపారు.
"మేము వైరస్తో మాత్రమే పోరాడటం లేదు. వైరస్ వ్యాప్తిని తగ్గించడానికి మేం చేసే చర్యలను తక్కువ చేస్తూ... తప్పుడు వార్తలను ప్రచారం చేసే ట్రోల్స్, కుట్రలపైనా పోరాడుతున్నాం."
-టెడ్రోస్ అధనామ్ గెబ్రెయెసస్, డబ్ల్యూహెచ్ఓ డైరెక్టర్ జనరల్
పేరుపై రగడ!
నగరాలు, ప్రాంతాల పేర్లతో వైరస్లను పిలవకుండా ప్రపంచ ఆరోగ్య సంస్థ జాగ్రత్త పడుతోంది. తాజా సంచలనం అయిన కరోనా వైరస్ను తాత్కాలికంగా '2019-ఎన్సీఓవీ అక్యూట్ రెస్పిరేటరీ డిసీజ్'గా నామకరణం చేస్తూ ఇదివరకే ప్రకటించింది. అయితే వైరస్ పేరుకు సంబంధించి తుది నిర్ణయం మరికొద్ది రోజుల్లో డబ్ల్యూహెచ్ఓ ప్రకటించనుంది. డబ్ల్యూహెచ్ఓ, అంతర్జాతీయ వైరస్ వర్గీకరణ కమిటీ కలిసి సంయుక్తంగా వైరస్ పేరుకు సంబంధించి తుది నిర్ణయం తీసుకోనున్నాయి.
"ఎలాంటి ప్రాంతాల పేర్లతో సంబంధం లేకుండా మధ్యంతర పేరును ప్రకటించడం చాలా ముఖ్యమని మేం అనుకుంటున్నాం. ఇప్పటికే చాలా వార్తా సంస్థలు ఈ వైరస్ను వుహాన్ లేదా చైనాగా పిలుస్తున్నాయి. అందుకే ఏ నగరానికి అప్రతిష్టలు రాకుండా చూడాలనుకుంటున్నాం."
-మారియా వాన్ కెర్కోవ్, డబ్ల్యూహెచ్ఓ ఎమర్జింగ్ డిసీజ్ యూనిట్ హెడ్
2015లో వెలువరించిన డబ్ల్యూహెచ్ఓ మార్గనిర్దేశకాల ప్రకారం వ్యాధులకు ప్రాంతాల పేర్లు పెట్టడం నిషేధం. ఎబోలా, జికా వంటి ప్రాంతాల పేర్లతో పాటు, ఓ వర్గాన్ని ప్రతిబింబించే 'స్పానిష్ ఫ్లూ' వంటి పేర్లనూ ఉపయోగించకూడదని ఈ మార్గనిర్దేశకాలు స్పష్టం చేస్తున్నాయి.
ఇదీ చదవండి: బొమ్మల దిగుమతిపై సుంకాల పెంపు.. ఉపాధికి గండి!
