బ్రిటన్​: ముందస్తు ఎన్నికల ప్రతిపాదన తిరస్కరణ

బ్రిటన్​ పార్లమెంట్​లో ఆ దేశ ప్రధాని బోరిస్​ జాన్సన్​కు గట్టి ఎదురుదెబ్బ తగిలింది. బ్రెగ్జిట్​ వ్యూహాన్ని సొంత పార్టీలోని కొందరు సభ్యులు వ్యతిరేకిస్తూ వస్తున్నారు. తాజాగా అక్టోబర్​ 15న ముందస్తు ఎన్నికల కోసం ప్రధానమంత్రి ప్రవేశపెట్టిన తీర్మానాన్ని ఓడించారు.

బ్రెగ్జిట్‌ విషయంలో బ్రిటన్‌ ప్రధాని బోరిస్‌ జాన్సన్‌కు ఆ దేశ పార్లమెంటులో వరుస ఓటములు తప్పడం లేదు. అక్టోబర్‌ 31నాటికి ఎలాంటి ఒప్పందం లేకుండా ఐరోపా సమాఖ్య నుంచి బ్రిటన్‌ వైదొలిగేందుకు ప్రధానమంత్రి చేసిన ప్రయత్నాలను విపక్ష ఎంపీలతోపాటు కొందరు అధికారపక్ష ఎంపీలూ అడ్డుకున్నారు.

ఈ అంశంపై పార్లమెంటులో జరిగిన ఓటింగ్‌లో ప్రధాని ప్రతిపాదనను అనుకూలంగా 299 ఓట్లు, వ్యతిరేకంగా 327 ఓట్లు పడ్డాయి. ఫలితంగా ఎలాంటి ఒప్పందం లేకుండా బ్రెగ్జిట్‌ను అడ్డుకున్న ఎంపీలు తర్వాత అక్టోబర్‌ 15న ముందస్తు ఎన్నికల కోసం ప్రధానమంత్రి ప్రవేశపెట్టిన తీర్మానాన్ని ఓడించారు.

650 మంది సభ్యులున్న పార్లమెంటులో ముందస్తు ఎన్నికలకు వెళ్లాలంటే మూడింట రెండొంతుల మెజార్టీ అవసరం కాగా తీర్మానానికి అనుకూలంగా 298 ఓట్లు మాత్రమే వచ్చాయి. 56 వ్యతిరేకంగా పడ్డాయి. ఫలితంగా తీర్మానం వీగిపోయింది. అనంతరం బ్రెగ్జిట్‌కు సంబంధించిన బిల్లులో సవరణలపై ఎంపీలు చర్చను ప్రారంభించారు.

ఇదీ చూడండి: బ్రెగ్జిట్​: పార్లమెంట్​లో బోరిస్​కు సొంత పార్టీ షాక్