అఫ్గానిస్థాన్ను ఆక్రమించుకున్న తాలిబన్లు(Afghan taliban).. ప్రభుత్వం ఏర్పాటు(Afghan govt formation) చేసేందుకు సిద్ధమయ్యారు. అయితే.. కొత్త ప్రభుత్వ ఏర్పాటుపై ప్రకటనను వచ్చే వారానికి వాయిదా వేశారు. శుక్రవారమే ప్రకటిస్తామని చెప్పగా.. దానిని శనివారానికి వాయిదా వేశారు. తాజాగా మరోమారు వాయిదా పడినట్లు తాలిబన్ ప్రతినిధి జబియుల్లా ముజాహిద్ ప్రకటించారు. "కొత్త ప్రభుత్వం, కేబినెట్ సభ్యుల వివరాల ప్రకటన వచ్చే వారం ఉంటుంది," అని శనివారం తెలిపారు ముజాహిద్. కాగా.. అంతర్జాతీయ సమాజం ఆమోదం పొందేలా నాయకత్వానికి తుదిరూపు ఇవ్వటంలో తాలిబన్లు ఇబ్బంది పడుతున్నట్లు తెలుస్తోంది.
తాలిబన్ సహ వ్యవస్థాపకుడు ముల్లా అబ్దుల్ ఘనీ బరాదర్ నేతృత్వంలో కొత్త ప్రభుత్వం ఏర్పాటుపై శనివారం తుది ప్రకటన వస్తుందని అంతా భావించారు. అయితే.. మరోమారు వాయిదా వేయటం వల్ల తాలిబన్ల మధ్య అంతర్గతంగా విబేధాలు ఉన్నాయా? అన్న ప్రశ్నలు ఉత్పన్నమవుతున్నాయి. ఈ క్రమంలో ప్రభుత్వ ఏర్పాటుపై వివిధ గ్రూప్లతో చర్చించేందుకు ఏర్పాటు చేసిన కమిటీ సభ్యుడు ఖలీల్ హక్కానీ కీలక వ్యాఖ్యలు చేశారు. ప్రపంచం ఆమోదించేలా ఉండే విస్తృతమైన ప్రభుత్వాన్ని ఏర్పాటు చేయాలని తాలిబన్లు భావిస్తున్నారని, అందుకే జాప్యం జరుగుతున్నట్లు స్పష్టం చేశారు.
'తాలిబన్లు సొంతంగా ప్రభుత్వాన్ని ఏర్పాటు చేసుకోగలరు. కానీ, వారి పరిపాలనా విభాగంలో అన్ని పార్టీలు, గ్రూప్లు, సమాజంలోని పలువురికి సముచిత స్థానం కల్పించాలని భావిస్తున్నారు. తాలిబన్లతోనే కూడిన ప్రభుత్వాన్ని ప్రపంచం ఆమోదించకపోవచ్చు. అఫ్గాన్ మాజీ అధ్యక్షుడు అష్రాఫ్ ఘనీ సోదరుడు గుల్బుద్దీన్ హెక్మాత్యార్కు ప్రభుత్వంలో స్థానం కల్పించనున్నారు. ప్రభుత్వానికి కూడగట్టేందుకు ఇతర భాగస్వామ్య గ్రూప్లతోనూ చర్చలు చేపడుతున్నారు.'
- ఖలీల్ హక్కానీ, ప్రభుత్వ ఏర్పాటు కమిటీ సభ్యుడు