కరోనా ఎఫెక్ట్: 5 నగరాలపై ఆంక్షలు.. 630కి పైగా కేసులు నమోదు

అంతుచిక్కని కరోనా వైరస్ ధాటికి చైనా విలవిలలాడుతోంది. ఈ వైరస్​ వ్యాప్తిని అరికట్టేందుకు చైనా ప్రభుత్వం చర్యలు చేపడుతోంది. వైరస్​కు కేంద్ర బిందువుగా భావిస్తోన్న వుహాన్​తో సహా మరో నాలుగు నగరాల రాకపోకలపై ఆంక్షలు విధించింది.

కొత్తరకం వైరస్​ కరోనా ప్రపంచాన్ని కలవరపెడుతోంది. ఇప్పటికే ఈ మహమ్మారి కారణంగా 18 మంది మృతి చెందారు. 630 కేసులకు పైగా నమోదయ్యాయి. వైరస్​ వ్యాప్తిని అడ్డుకునేందుకు వుహాన్​ సహా మరో నాలుగు నగరాల రాకపోకలను నిషేధించింది చైనా ప్రభుత్వం. ప్రజారవాణా, రైలు, విమాన సర్వీసులను నిలిపివేసింది.

చైనాలోని 25 రాష్ట్రాల్లో కలిపి మొత్తం 631 కరోనా వైరస్​ కేసులు నమోదయ్యాయి. బాధితుల సగటు వయసు 73గా అధికారులు తెలిపారు.

వుహాన్​ నగరానికి వెళ్లిన వారికే ఈ వైరస్​ వ్యాప్తి చెందినట్లు అధికారులు తొలుత భావించారు. అయితే తాజాగా ఆ నగరానికి ప్రయాణించని వారికి కూడా ఈ వైరస్​ వ్యాప్తి చెందినట్లు తెలిసింది.

ఈ వైరస్​ భయంతో బీజింగ్ సహా ప్రధాన నగరాల్లో ప్రత్యేక కార్యక్రమాలను రద్దు చేశారు. వసంత పండుగ సందర్భంగా జరిగే సాంస్కృతిక కార్యక్రమాలను నిషేధించారు.

ఆరోగ్య అత్యవరస పరిస్థితి!

కరోనా వైరస్​ దృష్ట్యా ఆరోగ్య అత్యవసర పరిస్థితి విధింపు పరిశీలనపై డబ్ల్యూహెచ్ఓ స్పందించింది. ప్రస్తుతం ఆరోగ్య అత్యవసర పరిస్థితి విధించడం లేదని తెలిపింది. ఈ నిర్ణయంతో ఆందోళనకర పరిస్థితి లేదు అని తమ అభిప్రాయం కాదని వివరించింది. చైనాలో ఇది అత్యవసర పరిస్థితి అయినప్పటికీ.. ప్రపంచవ్యాప్తంగా కాదని పేర్కొంది.

• ఇదీ చూడండి: సౌదీలో కేరళ నర్సుకు సోకిన కరోనా వైరస్​