'ఇరాన్​ జాగ్రత్త.. ఆ 52 ప్రాంతాల్లో దాడి చేస్తాం'

ఇరాన్​కు చెందిన 52 స్థలాలను లక్ష్యంగా చేసుకున్నామని.. అవసరమైతే దాడి చేయడానికి సిద్ధంగా ఉన్నామని అమెరికా అధ్యక్షుడు డొనాల్డ్​ ట్రంప్​ ప్రకటించారు. తమ పౌరులకు హాని కలిగితే సహించబోమని స్పష్టం చేశారు. ట్రంప్​ వ్యాఖ్యలతో అమెరికా-ఇరాన్​ దేశాల మధ్య నెలకొన్న ఉద్రిక్తత మరింత పెరిగింది.

పశ్చిమాసియాలో యుద్ధమేఘాలు అలుముకున్న వేళ.. ఇరాన్​ను మరోమారు తీవ్రంగా హెచ్చరించారు అమెరికా అధ్యక్షుడు డొనాల్డ్​ ట్రంప్​. అమెరికన్లపైనా, అమెరికా ఆస్తులపైనా దాడి చేయడానికిఇరాన్ ప్రయత్నిస్తే.. సహించబోమని స్పష్టం చేశారు. ఇప్పటికే ఇరాన్​కు సంబంధించిన 52 ప్రాంతాలను లక్ష్యంగా చేసుకున్నామని.. వాటిపై ఎంతో వేగంగా, ఎంతో బలంగా దాడి చేయడానికి సిద్ధమని ట్వీట్​ చేశారు.

ట్రంప్​ ట్వీట్లు

"ఇరాన్​ ఉగ్రనేత(సులేమానీ) నుంచి ప్రపంచానికి విముక్తి కలిగించాం. సులేమానీ తన జీవితంలో ఎందరినో చంపాడు. మరెందరినో గాయపరిచాడు. కానీ మాపై ప్రతికారం తీర్చుకుంటామని ఇరాన్​ అంటోంది. ఇరాన్​ ఎన్నో ఏళ్ల నుంచి సమస్యలను సృష్టిస్తూనే ఉంది. ఆ దేశానికి ఇదొక హెచ్చరికలా ఉండాలి. అమెరికన్లకైనా, అమెరికా ఆస్తులకైనా ఇరాన్​ వల్ల నష్టం జరగకూడదు. ఒక వేళ అదే జరిగితే.. మేము ఇప్పటికే ఇరాన్​కు చెందిన 52 ప్రాంతాలను లక్ష్యంగా చేసుకున్నాం. వాటిల్లో ఇరాన్​కు ముఖ్యమైనవి, చారిత్రకమైనవి ఎన్నో ఉన్నాయి. వాటిపై ఎంతో వేగంగా, ఎంతో బలంగా దాడి చేస్తాం."
--- డొనాల్డ్​ ట్రంప్​, అమెరికా అధ్యక్షుడు.

అమెరికా దళాలే లక్ష్యంగా బగ్దాద్​లోశనివారంరాకెట్​ దాడి జరిగింది. ఈ నేపథ్యంలోనే ట్రంప్​ ట్వీట్​ చేశారు. అయితే ఈ ఘటనలో ఎలాంటి ప్రాణ నష్టం జరగలేదని ఇరాక్​ అధికారులు స్పష్టం చేశారు.

శుక్రవారం బగ్దాద్​ విమానాశ్రయంపై అమెరికా దళాలు రాకెట్లతో దాడి చేశాయి. ఈ ఘటనలో ఇరాన్​ టాప్ కమాండర్​ ఖాసిం సులేమానీ మృతి చెందారు. వేకువజామున జరిగిన ఈ ఘటనలో సులేమానీ, ఇరాక్​కు చెందిన ఉన్నత స్థాయి కమాండర్లు సహా ఎనిమిది మంది మరణించారు.

ఈ దాడికి ప్రతీకారం తీర్చుకుంటామని ఇరాన్ ఇప్పటికే ప్రకటించగా.. పశ్చిమాసియాలో భారీగా బలగాలను మోహరించింది అమెరికా.

ఇదీ చూడండి:- 'ఇరాన్​ ప్రతీకారానికి అమెరికా సిద్ధంగా ఉండాలి'