'నిర్లక్ష్యం... అతివేగమే... రోడ్డు ప్రమాదాలకు కారణం'

నిర్లక్ష్యంతో అతివేగంగా వాహనాలు నడపడం వల్లే అనేక రోడ్డు ప్రమాదాలు జరుగుతున్నాయని రాచకొండ సీపీ మహేశ్​ భగవత్​ తెలిపారు. ఎల్బీనగర్ కామినేని ఆస్పత్రి ఆడిటోరియంలో రోడ్డు ప్రమాదాలపై నిర్వహించిన అవగాహన కార్యక్రమంలో ఆయన పాల్గొని మాట్లాడారు.

రోడ్డు ప్రమాదాల కంటే ముందుగా అవి ఏ విధంగా జరుగుతున్నాయనే విషయంపై అందరికీ అవగాహన ఉండాలని రాచకొండ సీపీ మహేశ్​ భగవత్ అన్నారు. 31వ రోడ్డు భద్రతా వారోత్సవాలను పురస్కరించుకుని రాచకొండ పోలీసులు 'వుయ్ వాంట్ యూ సేఫ్' పేరుతో జనవరి 27 నుంచి ఫిబ్రవరి 2 వరకు ప్రత్యేక కార్యక్రమాలను చేపట్టారు. ఇందులో భాగంగా హైదరాబాద్​ ఎల్బీనగర్ కామినేని వైద్యశాల ఆడిటోరియంలో శనివారం రోడ్డు ప్రమాదాలపై అవగాహన నిర్వహించారు.

ఈ కార్యక్రమానికి ముఖ్యఅతిథిగా రాచకొండ పోలీస్ కమిషనర్ మహేశ్​ భగవత్ హాజరై ప్రసంగించారు. నిర్లక్ష్యంతో అతివేగంగా వాహనాలు నడపడం వల్లే అధిక ప్రమాదాలు జరుగుతున్నాయని... అందరూ విధిగా రోడ్డు భద్రతా నియమాలను పాటిస్తే ప్రమాదాలను నివారించవచ్చునని తెలిపారు. ద్విచక్ర వాహన చోదకులు శిరస్త్రాణం తప్పనిసరిగా ధరించాలని, వెనక కూర్చున్నవారూ హెల్మెట్​ పెట్టుకోవాలని సూచించారు. ఈ కార్యక్రమంలో వివిధ కళాశాలలకు చెందిన విద్యార్థులు, డ్రైవర్లు, ట్రాఫిక్ పోలీసులు పాల్గొన్నారు.

ఇదీ చూడండి: బడ్జెట్​ సమావేశంలో మంత్రి నిర్మల కశ్మీరీ కవిత