పెయింట్​ డబ్బాలు పడేస్తున్నారా... తస్మాత్​ జాగ్రత్త!

పెయింట్ డబ్బాలు పేలుతున్నాయి. ఇంటి గోడలకు, కిటికీలకు, తలుపులకు రంగులద్దిన తర్వాత... వాటిలో మిగిలిపోయే రంగులను అలాగే వదిలేసి పడేస్తున్న డబ్బాలే చిన్నపాటి బాంబుల్లా మారుతున్నాయి. ఒక్కసారిగా తెరుస్తుండటం వల్ల రసాయనిక చర్యల కారణంగా ప్రమాదాలు జరుగుతున్నాయి. చెత్తకుండీలో పడేస్తోన్న పెయింట్​ డబ్బాలు చెత్త ఏరుకునే వారి పాలిట యమపాశాలవుతున్నాయి. భాగ్యనగరంలో ఈ తరహా పేలుళ్లు ఎక్కువవుతున్నాయి.

హైదరాబాద్​ మీర్​పేట్​లోని విజయపురి కాలనీలో చెత్తలో ఉన్న రంగు డబ్బా మూత తెరుస్తుండగా... పేలుడు సంభవించింది. ఈ ఘటనలో నిర్మల అనే చెత్త సేకరించే మహిళ కాళ్లు, చేతులకు తీవ్ర గాయాలయ్యాయి. నెల క్రితం రాజేంద్రనగర్​లోని అత్తాపూర్​లోనూ డబ్బా పేలి సయ్యద్ ఖాజా అనే వ్యక్తి మృతి చెందాడు.

నేలకేసి కొట్టాడు.. అంతే!

చెత్తకుండీలో పెయింట్ డబ్బాను గుర్తించిన ఖాజా.... దాని తీసుకొని రహదారి పక్కనే కూర్చొని తెరిచేందుకు ప్రయత్నించాడు. రాయికేసి బలంగా కొట్టగా.. ఒక్కసారిగా పేలి శరీరానికి మంటలంటుకున్నాయి. ఆస్పత్రికి తరలించేలోగానే మృతి చెందాడు

గతేడాది జనవరిలో యూసూఫ్ గూడ వెంకటగిరి కూడలిలో ఉన్న స్క్రాప్ దుకాణంలో మాణిక్ రావు అనే వ్యక్తి పాత వస్తువులను విక్రయించాడు. తన వద్ద ఉన్న డబ్బా మూత తీసే క్రమంలో నేలకేసి బలంగా కొట్టగా పేలుడు సంభవించి మాణిక్ రావు మృతి చెందాడు.

రసాయనానికి ఆక్సిజన్​ తోడై...

గృహాలకు రంగులు వేసేందుకు రకరకాల కంపెనీలకు చెందిన పెయింట్ డబ్బాలను వినియోగిస్తున్నారు. మిగిలిన రంగును అలాగే వదిలేసి మూత పెడుతున్నప్పుడు గాలి డబ్బాలోకి చేరుతోంది. ఆ గాలి డబ్బా కింది భాగంలోకి చేరుకుని... పెయింట్​లో ఉండే రసాయనాలకు ఆక్సిజన్​ తోడై మిథైన్​గా మారుతోంది. చెత్తకుండీల్లో డబ్బాలు పడేసినప్పుడు ఎండకు వేడెక్కుతున్నాయి. ఆ వేడి వల్ల లోపలున్న రసాయన ద్రావణానికి ఆక్సిజన్​ తోడై విస్ఫోటనం జరుగుతోంది.

ఇలా చేస్తే.. పేలవు

స్టోర్ రూమ్​లలో పాత పెయింట్ డబ్బాలుంటే అవి పేలిపోతాయేమోనన్న కంగారులో వాటిని పడేసినా అవి కూడా పేలే ప్రమాదముందని నిపుణులు చెబుతున్నారు. నిరుపయోగంగా ఉన్న పెయింట్​ డబ్బాలను తెరిచే ముందు రెండు గంటల పాటు చల్లని నీళ్లలో ఉంచాలి. ఆ తర్వాత నెమ్మదిగా డబ్బా మూత తెరిచి చెత్తకుండీలో పడవేస్తే ఎటువంటి ప్రమాదం ఉండదని నిపుణులు చెబుతున్నారు.

• ఇదీ చూడండి : బంగారం, వెండి కాస్త చౌక... తగ్గిన ధరలు ఇవే