PVR Cinemas popcorn Price : ప్రముఖ మల్టీప్లెక్స్పీవీఆర్ సినిమాస్.. తమ థియేటర్లలో స్నాక్స్, పెప్సీ ధరలను భారీగా తగ్గిస్తున్నట్లు బుధవారం ట్విట్టర్ వేదికగా తెలిపింది. ఇకపై వీక్ డేస్లో రూ. 99కే స్నాక్స్ కాంబో అందిస్తున్నట్లు వెల్లడించింది. వీకెండ్లో అపరిమితమైన పాప్కార్న్, పెప్సీని పొందే ఆఫర్ను పీవీఆర్ ప్రకటించింది. ఓ సామాన్య సినీప్రియుడు.. పీవీఆర్లో అధిక ధరలపై చేసిన ట్వీట్కు స్పందించి ఈ మేరకు నిర్ణయం తీసుకుంది.
ఇదీ జరిగింది..
ఉత్తర్ప్రదేశ్ నొయిడా 'పీవీఆర్ సినిమాస్'లో మూవీ చూసేందుకు వెళ్లిన త్రిదిప్ కే మండల్ అనే వ్యక్తికి.. అక్కడ అధిక ధరల షాక్ తగిలింది. రెగ్యులర్ సైజ్ చీజ్ పాప్కార్న్, 600 మిల్లీ లీటర్ల ఓ కూల్డ్రింక్కు థియేటర్ నిర్వాహకులు వసూల్ చేసిన బిల్లు చూసి ఆ వ్యక్తి ఆశ్చర్యపోయారు. దీంతో ఆ బిల్లు ఫొటోను ట్విట్టర్లో పోస్ట్ చేసి.. " నొయిడా పీవీఆర్ సినిమాస్లో.. 55 గ్రాముల చీజ్ పాప్కార్న్ ధర రూ. 460, 600 మిల్లీలీటర్ల పెప్సీ ధర రూ.360గా ఉంది. మొత్తం రూ.820. ఇది అమెజాన్ ప్రైమ్ వార్షిక చందాకు దాదాపు సమానం. ప్రజలు సినిమాలకు వెళ్లకపోవడంలో ఆశ్చర్యం లేదు. కుటుంబ సభ్యులతో కలిసి సినిమా చూడడం చాలా కష్టం" అని రాసుకొచ్చారు.