త్రైమాసిక ఫలితాలే ఈ వారం మార్కెట్లకు దిశానిర్దేశం

అంతర్జాతీయంగా అమెరికా-ఇరాన్​ల మధ్య ఉద్రిక్తతలు తగ్గుముఖం పట్టడం వల్ల ప్రస్తుతం అమెరికా-చైనాల వాణిజ్య ఒప్పందంపై మార్కెట్ల దృష్టి నెలకొంది. త్రైమాసిక ఆదాయాలు, ఇన్ఫోసిస్ ఫలితాలు మార్కెట్లను ప్రభావితం చేసే అవకాశం ఉందని నిపుణులు చెబుతున్నారు. అంతర్జాతీయ అనిశ్చితి వల్ల మార్కెట్లు అస్థిరతకు లోనయ్యే అవకాశం ఉందని వ్యాపార వర్గాలు అంచనా వేస్తున్నాయి.

కంపెనీల త్రైమాసిక ఆదాయాలు, ద్రవ్యోల్బణం సహా వాణిజ్య ఒప్పందంపై అమెరికా-చైనాల సంతకం వంటి అంశాలపై ఈ వారం ఈక్విటీ మార్కెట్ ఆధారపడి ఉంటుందని విశ్లేషకులు అభిప్రాయపడుతున్నారు.

"క్యూ3 ఆదాయాలు, బడ్జెట్ వంటి అంశాలపై ఈ వారం మార్కెట్ దృష్టి నెలకొంది. విప్రో, ఇండస్​ఇండ్ బ్యాంక్, రిలయన్స్ ఇండస్ట్రీస్, హెచ్​సీఎల్ టెక్నాలజీస్, హెచ్​డీఎఫ్​సీ బ్యాంక్​ సంస్థలు ఈ వారం తమ మూడో త్రైమాసిక ఆదాయాలను ప్రకటించనున్నాయి."-సంతోష్ మీనా, సీనియర్ రీసెర్చీ అనలిస్ట్, ట్రేడింగ్ బెల్స్​

సంస్థ అంతర్గత ఆడిట్ కమిటీ కంపెనీ యాజమాన్యానికి క్లీన్ చిట్ ఇచ్చినందున సోమవారం ఇన్ఫోసిస్ షేర్లు సానుకూలంగా స్పందించవచ్చని మీనా పేర్కొన్నారు. ఇన్ఫోసిస్ శుక్రవారం విడుదల చేసిన త్రైమాసిక ఫలితాలు మార్కెట్​పై సానుకూల ప్రభావం చూపించవచ్చన్నారు.

"సోమవారం మార్కెట్ ప్రారంభమైన కొన్ని గంటల్లో ఐటీ దిగ్గజం ఇన్ఫోసిస్ ఫలితాలకు స్పందిస్తాయి. అంతర్జాతీయ అనిశ్చితులు, ప్రస్తుత ఆదాయాల సీజన్​లో అధిక రిస్క్​ కలిగిన షేర్ల వల్ల మార్కెట్లు అస్థిరతకు గురయ్యే అవకాశం ఉంది."-అజిత్ మిశ్రా, వైస్ ప్రెసిడెంట్, రీసెర్చ్, రెలిగేర్ బ్రోకింగ్ లిమిటెడ్

2019 నవంబర్​లో పారిశ్రామిక ఉత్పత్తి వృద్ధి చెందడం, ఫిబ్రవరి ప్రారంభంలో రిజర్వు బ్యాంక్ తీసుకునే ద్రవ్య విధానాలు కూడా మార్కెట్లపై ప్రభావం చూపిస్తాయని నిపుణులు తెలిపారు. మార్కెట్లలో అస్థిరత ఉన్నప్పటికీ బడ్జెట్ ప్రవేశపెట్టేంత వరకు ధరల్లో అధికంగా మార్పులు సంభవించే అవకాశం లేదన్నారు.

ఇదీ చదవండి: గత దశాబ్దంలో రూ.4.7 లక్షల కోట్ల పంట రుణాలు మాఫీ