పండుగ సీజన్ అయిన అక్టోబర్లో దేశీయ ఆటోమొబైల్ రంగానికి స్వల్ప ఊరట లభించింది. మారుతీ సుజుకీ ఇండియా, మహీంద్రా అండ్ మహీంద్రా, టొయోటా కిర్లోస్కర్ మోటర్స్ గతంలో కంటే మెరుగైన పనితీరును కనబరిచినట్లు ప్రకటించాయి.
దేశీయ అతిపెద్ద కార్ల తయారీ సంస్థ మారుతీ సుజుకీ ఇండియా (ఎంఎస్ఐ) అక్టోబర్ నెలలో 4.5 సాతం మేర వృద్ధి సాధించింది. 2018 అక్టోబర్లో 1,38,100 కార్లు అమ్ముడవగా.. గత నెలలో 1,44,277 యూనిట్లు విక్రయించినట్లు తెలిపింది. గడిచిన 7 నెలల కాలంలో తొలిసారి దేశీయ అమ్మకాల్లో వృద్ధి నమోదు చేసింది.
ఎం అండ్ ఎం..
మందగమన భయాలు ఉన్నప్పటికీ.. మహీంద్రా అండ్ మహీంద్రా సంస్థ మెరుగైన పనితీరు కనబరిచింది. 2018 అక్టోబర్తో పోల్చితే విక్రయాల్లో 11 శాతం మేర క్షీణత నమోదైంది. కానీ సెప్టెంబర్తో పోల్చితే సుమారు 10 శాతం మేర వృద్ధి నమోదు చేసింది. 2018 అక్టోబర్లో 55,350 యూనిట్లు అమ్ముడవగా.. ఈ ఏడాది 49,193 యూనిట్లుగా ఉంది. సెప్టెంబర్లో 21 శాతం క్షీణతతో 40,692 యూనిట్లు విక్రయించింది సంస్థ.
టొయోటా..
టొయోటా కిర్లోస్కర్ మోటర్స్ విక్రయాల్లో గతేడాదితో పోల్చితే 6 శాతం క్షీణత నమోదయింది. కానీ సెప్టెంబర్ నెలతో పోల్చితే మంచి పనితీరు కనబరిచింది. 2018, అక్టోబర్లో 12,606 యూనిట్లు విక్రయించగా.. ఈ ఏడాది అక్టోబర్లో 11,866 యూనిట్లు అమ్ముడయ్యాయి. ఈ ఏడాది సెప్టెంబర్లో 10,203 యూనిట్లు అమ్ముడయ్యాయి.
భారత మార్కెట్లోకి ఇటీవలే ప్రవేశించిన ఎంజీ మోటర్స్ ఇండియా అక్టోబర్లో తన ఎస్యూవీ హెక్టార్ కార్లు 3.536 యూనిట్లు విక్రయించింది.
ద్విచక్రవాహనాలు..
ద్విచక్ర వాహన రంగంలో బజాజ్ ఆటో దేశీయ అమ్మకాల్లో 13 శాతం క్షీణత నమోదు చేసింది. 2018లో అక్టోబర్లో 3,19,942 యూనిట్లు విక్రయించగా.. ఈ ఏడాది 2,78,776 యూనిట్లుగా ఉంది.
టీవీఎస్ మోటర్స్ సంస్థ గతేడాదితో పోల్చితే అక్టోబర్లో 25.45 శాతం మేర క్షీణించి 2,52,684 యూనిట్లు విక్రయించింది. 2018 అక్టోబర్లో ఈ సంఖ్య 3,38,988 యూనిట్లుగా ఉంది.
వాణిజ్య వాహనాల తయారీ సంస్థ అశోక్ లేలాండ్ గతేడాదితో పోల్చితే ఈ అక్టోబర్లో 37 శాతం క్షీణించి 9,074 యూనిట్లు విక్రయించింది. 2018లో ఈ సంఖ్య 14,341 యూనిట్లుగా ఉంది.
ఇదీ చూడండి:అక్టోబర్లోనూ నిరాశపరిచిన జీఎస్టీ వసూళ్లు
