నిరుద్యోగ జాబితాలో ఈ ఏడాది మరో 25 లక్షల మంది

ఆర్థిక మందగమన పరిస్థితులతో ఈ ఏడాది ప్రపంచ వ్యాప్తంగా నిరుద్యోగుల సంఖ్య భారీగా పెరిగే అవకాశాలు కనిపిస్తున్నాయి. ఐరాస కార్మిక సంస్థ విడుదల చేసిన నివేదిక ప్రకారం.. 2020లో మరో 25 లక్షల మందిని నిరుద్యోగ సమస్య వెంటాడొచ్చని వెల్లడించింది.

ప్రపంచ వ్యాప్తంగా 2020లో మరో 2.5 మిలియన్ల మంది నిరుద్యోగులుగా మారే అవకాశమున్నట్లు ఐక్యరాజ్య సమితి(ఐరాస) కార్మిక సంస్థ నివేదిక తెలిపింది. కోరుకున్న వేతనాలు వచ్చే ఉపాధి లభించకపోవడం కారణంగా.. దాదాపు 50 కోట్ల మంది తక్కువ వేతనాలకే పని చేయొచ్చని పేర్కొంది.

ఉద్యోగాల సృష్టిలో క్షీణత..

అంతర్జాతీయ కార్మిక సంస్థ (ఐఎల్​ఓ) విడుదల చేసిన ప్రపంచ ఉద్యోగ కల్పన, సామాజిక ముఖచిత్రం (డబ్ల్యూఎస్​ఓ) నివేదిక ప్రకారం.. గత తొమ్మిదేళ్లుగా ఉద్యోగకల్పన కాస్త అటు ఇటుగా స్థిరంగానే ఉంది. అయితే ప్రస్తుతం ప్రపంచ వ్యాప్తంగా ఆర్థిక మందగమన పరిస్థితులు నెలకొన్నాయి. ఈ నేపథ్యంలో పెరిగిన శ్రామిక శక్తికి.. అవరసరమైన ఉద్యోగాల సృష్టి జరగటం లేదని నివేదిక అభిప్రాయపడింది.

ఉద్యోగ కల్పన క్షీణించడం కారణంగా మిలియన్ల మందికి ఉపాధి ద్వారా లభించే.. సరైన జీవన విధానాన్ని కల్పించడం కష్టతరమవుతుందని ఐఎల్​ఓ డైరెక్టర్​ జనరల్​ గాయ్ రేడర్​ తెలిపారు.

ప్రపంచ వ్యాప్తంగా నిరుద్యోగుల లెక్క..

ప్రపంచ వ్యాప్తంగా ప్రస్తుతం అంతర్జాతీయ ప్రమాణాలకు అనుగుణంగా చూస్తే.. నిరుద్యోగుల సంఖ్య 188 మిలియన్లుగా ఉంది. 165 మిలియన్ల మంది తక్కువ వేతనాలకు ఉద్యోగాలు చేస్తున్నారు.

120 మిలియన్ల మంది ఉద్యోగాలు వెతకడం ఆపేయడం గానీ.. ఎలా ఉద్యోగాలు సంపాదించాలో తెలియకపోవడం వంటి పరిస్థితుల్లో ఉన్నారు. మొత్తంగా ప్రపంచ వ్యాప్తంగా 470 మిలియన్ల మందికిపైగా ప్రభావితమవుతున్నారని ఐరాస నివేదిక పేర్కొంది.

ఇదీ చూడండి:ఆదాయపన్ను కోత అనివార్యమైతే.. వీటిపైనే ప్రభుత్వ దృష్టి!