అంతర్జాతీయంగా అమెరికా- చైనా వాణిజ్య యుద్ధం, ఆర్థిక మాంద్యం వంటి ఎన్నో అవరోధాలు ఉన్నా.. దేశీయ స్టాక్ మార్కెట్లు ఈ ఏడాది సానుకూల వృద్ధిని నమోదు చేశాయి. ఇటీవల వాణిజ్య యుద్ధానికి తెరపడినా.. ఆర్థిక వృద్ధి మందగమనం కొనసాగుతున్నట్లు గణాంకాలు స్పష్టం చేస్తున్నాయి.
కొన్ని సందర్భాల్లో సూచీలు ఆందోళనకర సంకేతాలిచ్చినా.. పడి లేచిన కెరటాల్లా మళ్లీ లాభాల్లో కొనసాగాయి. ముఖ్యంగా ఈ ఏడాది సార్వత్రిక ఎన్నికల్లో మరోసారి మోదీ.. ప్రభుత్వాన్ని ఏర్పాటు చేయడం కారణంగా రాజకీయ పరంగా సుస్థిరత ఏర్పడింది. ఫలితంగా ఆటుపోట్లు ఉన్నా మార్కెట్లు ముందుకే పయనించాయి. ఆర్థిక మందగమనం నేపథ్యంలో కేంద్రం ఉద్దీపనలు ప్రకటించడమూ మార్కెట్లకు కలిసొచ్చింది.
ఈ ఏడాదిలో సూచీలు సాగాయిలా..
36,254.57 పాయింట్లతో ఏడాది తొలి సెషన్ను ప్రారభించిన సెన్సెక్స్.. ప్రస్తుతం 40,575.14 పాయింట్ల వద్ద ఉంది (డిసెంబర్ 27 నాటికి). ఈ లెక్కన ఇప్పటి వరకు సెన్సెక్స్ 4,320.57 పాయింట్లు పెరిగింది.
నిఫ్టీ ఈ ఏడాది తొలి సెషన్ 10,910.10 వద్ద ప్రారంభించింది.. ప్రస్తుతం ఈ సూచీ 12,145.80 వద్ద ఉంది (డిసెంబర్ 27 నాటికి). ఇప్పటి వరకు నిఫ్టీ మొత్తం 1,235.7 పాయింట్లు బలపడింది.
కీలక స్థాయిలు ఇవే..
ఈ ఏడాదిలోనే సెన్సెక్స్ 39,000, 40,000, 41,000 మార్క్లను దాటింది. ప్రధానంగా సార్వత్రిక ఎన్నికల ఫలితాల్లో భాజపాకు స్పష్టమైన మెజారిటీ వస్తున్నట్లు తెలియడం వల్ల తొలిసారి మే 23న సెన్సెక్స్ 40,000 మార్క్ను తాకింది. నిఫ్టీ 12,000 మార్క్ను తాకింది. మోదీ 2.0 ప్రభుత్వం రెండో సారి ప్రభుత్వాన్ని ఏర్పాటు చేయడం కారణంగా కొన్ని రోజులు ఆ సానుకూలతలు కొనసాగాయి.
ఈ ఏడాది మొత్తం మీద ఇంట్రాడేలో.. సెన్సెక్స్ సెప్టెంబర్ 20న 2163 పాయింట్లకు పైగా లాభాన్ని గడించింది. నిఫ్టీ 655 పాయింట్లకు పైగా లాభాన్ని నమోదు చేసింది. కార్పొరేట్ పన్ను 10 శాతం మేర తగ్గిస్తూ ఆర్థిక మంత్రిత్వ శాఖ నిర్ణయం తీసుకోవడం ఇందుకు కారణం. ఇదే రోజు బీఎస్ఈ లిస్టెడ్ కంపెనీల్లో మదుపరుల సంపద రూ.7 లక్షల కోట్లు పెరిగింది.
నష్టాల పరంగా చూస్తే సెన్సెక్స్ బడ్జెట్ మరుసటి రోజు జులై 8న 793 పాయింట్లు, జీడీపీ రేటు తగ్గుదల ఆందోళనలతో సెప్టెంబర్ 3న 770 పాయింట్లు క్షీణించింది. సెప్టెంబర్ 3న నిఫ్టీ 225 పాయింట్లకు పైగా నష్టపోయింది.