భారత స్మార్ట్ఫోన్ విపణిలోకి అడుగుపెట్టిన షియోమీ సంస్థ.. అంచెలంచెలుగా ఎదిగి ఆరేళ్ల కాలంలోనే టాప్ సంస్థల్లో ఒకటిగా నిలిచింది. భారత వినియోగదారుల డేటాను చైనాతో పంచుకుంటూ, నిషేధానికి గురైన యాప్ల జాబితాలో ఈ సంస్థకు చెందిన రెండు యాప్లు(ఎంఐ కమ్యూనిటీ, ఎంఐ వీడియో కాల్) ఉన్నాయి. ప్రీ ఇన్స్టాల్ అయి ఫోన్తో వచ్చే వీటిని యూజర్లు తొలగించలేరు. మరి నిషేధించిన యాప్లు ఫోన్లో ఉంటే సమస్యలు వస్తాయా?
ప్రభుత్వం యాప్లను బ్యాన్ చేసినా కొన్ని రోజుల పాటు అత్యవసర సేవల యాప్లను కొనసాగించనున్నారు. ఈ లోపు యూజర్లు వేరే యాప్లను ఎంపిక చేసుకుంటారు. నిషేధిత సంస్థలు కూడా కొన్ని రోజుల తర్వాత అప్డేట్ ఇవ్వడం, డేటాను అప్డేట్ చేయడం వంటివి చేసేందుకు అనుమతి ఉండదు. ఫలితంగా ఆ యాప్లు నిరుపయోగంగా మారతాయి. అయితే దీనివల్ల ఫోన్లో కాస్త స్పేస్ వృథా అవుతుంది. ఎప్పుడైనా మొబైల్ సంస్థ ఓఎస్ అప్డేట్ విడుదల చేసినప్పుడు వాటిని తొలగించే అవకాశాలు ఉంటాయి.
ఇప్పటికే కొత్త గళం...
భారత మార్కెట్లో 31.2 శాతం షేర్ ఉన్న షియోమీ సంస్థ.. ఇటీవల కాలంలో 'మేడిన్ ఇండియా' మంత్రం జపిస్తోంది. చైనాతో గల్వాన్ ఘర్షణ తర్వత ఈ విషయంలో మరింత జోరు పెంచింది. ఇందుకు కారణం స్మార్ట్ఫోన్లు, టీవీలు, ల్యాప్టాప్లు, ఎలక్ట్రానిక్ ఉత్పత్తుల అమ్మకాల్లో భారత విపణిలో టాప్ స్థానంలో ఉండటమే. ఆ మార్కెట్ను కాపాడుకొనే ప్రయత్నాలు చేస్తోంది షియోమీ. భారత ప్రభుత్వానికే పన్నులు కడుతున్నామని.. దేశంలోనే పలు స్టార్టప్లలో పెట్టుబడులు పెట్టామని చెప్తోంది. అంతేకాకుండా సంస్థ ఆర్&డీ భారత్లోనే ఉందని.. యాజమాన్యం సహా 50వేల ఉద్యోగులు ఇక్కడివారేనని పదేపదే గుర్తుచేస్తోంది.
టాప్-100లో సగం..?
భారతీయ యాప్ మార్కెట్లోనూ చైనీయుల హవా పెరుగుతోంది. 2017లో టాప్-100 యాప్లలో 17 మాత్రమే ఉంటే.. 2018లో అవి 44కు పెరిగాయి. ఏడాది కాలంలోనే అవి దాదాపు మూడింతలయ్యాయి. భారత వినియోగదారులు చైనా యాప్ల వినియోగం తగ్గిస్తే.. ఆ దేశ సంస్థలు భారీగా నష్టాలు ఎదుర్కోనున్నాయి. 30 శాతం వినియోగదారులున్న ఒక్క టిక్టాక్ సంస్థే 10 శాతం ఆదాయం కోల్పోతుంది. ఇది ఆ దేశ ఆర్థిక వ్యవస్థపై ప్రభావం చూపనుంది.
