33వేల ఉద్యోగాల నియామకానికి అమెజాన్​ సిద్ధం

నిరుద్యోగులకు శుభవార్తను ప్రకటించింది ప్రముఖ ఈ-కామర్స్​ దిగ్గజం అమెజాన్​. 33 వేల నియామకాలు చేపట్టనున్నట్లు వెల్లడించింది. ఈ ప్రక్రియను సెప్టెంబర్​ 16 నుంచి ప్రారంభించనున్నట్లు పేర్కొంది.

కరోనా సంక్షోభం వల్ల అనేక కంపెనీలు ఆర్థికంగా ఇబ్బందులు ఎదుర్కొంటున్నాయి. దీంతో తమ ఉద్యోగాల్లో కోతలు విధించాయి. కానీ​ దిగ్గజ అమెజాన్​ మాత్రం ఇందుకు భిన్నంగా వ్యవహరిస్తోంది. రాబోయే రోజుల్లో కార్పొరేట్, టెక్​లకు సంబంధించి.. మొత్తం 33వేల ఉద్యోగులను తీసుకోనున్నట్టు సంస్థ ప్రకటించింది. ప్రస్తుత పరిస్థితుల్లో ఒకేసారి ఇంత పెద్ద మొత్తంలో ఉద్యోగాలు కల్పించటం విశేషం.

కరోనా కాలంలోనూ లాభాలను ఆర్జించిన కంపెనీల్లో అమెజాన్​ ఒకటి. లాక్​డౌన్​ కాలంలో కిరాణా సరుకులు, ఇతర సామాగ్రి కోసం ఆన్‌లైన్‌లో ఆర్డర్‌ చేయడానికి ప్రజలు అమెజాన్​ను ఆశ్రయించారు. ఈ-మార్కెట్​ ద్వారా ఏప్రిల్, జూన్ మధ్య కాలంలో రికార్డు స్థాయిలో ఆదాయాన్ని, లాభాలను పొందింది సంస్థ. సరుకులను ప్యాక్​ చేయటానికి, శుభ్రపరచడం కోసం ఓవర్​ టైం చేసిన కార్మికులకు బోనస్ చెల్లించటానికే 4 బిలియన్ డాలర్లు ఖర్చు చేసింది. వస్తువులను ప్యాక్​ చేయటానికి, రవాణా చేయటం కోసం 1,75,000 మంది.. సంస్థ గిడ్డంగుల్లో పని చేస్తున్నారు.

33 వేల ఉద్యోగాల కల్పనకు సంబంధించిన ప్రక్రియను సెప్టెంబర్​ 16 నుంచి ప్రారంభించనుంది.​ గత ఏడాది 30 వేల నియామకాలను చేపట్టగా.. 2 లక్షల దరఖాస్తులు ​ వచ్చాయని వెల్లడించింది.

జులై నాటికి ప్రపంచవ్యాప్తంగా మొత్తం 10 లక్షల మంది ఉద్యోగులతో అగ్రస్థానంలో నిలిచినట్లు అమెజాన్​ ప్రకటించింది. తర్వాతి స్థానంలో అమెరికాకు చెందిన వాల్​మార్ట్​ సంస్థ ఉంది.